بۇرالقى يتتەردى اۋلاۋعا، زارارسىزداندىرۋعا قانشا قاراجات قاجەت
استانا. KAZINFORM - ءماجىلىس دەپۋتاتى ەربولات ساتىبالدين قاڭعىباس يتتەردىڭ تاعدىرىنا قاتىستى بىرنەشە ۇسىنىس بارىن ايتتى.
«الەمدە بۇرالقى يتتەرگە قاتىستى ەكى پراكتيكا بار، ءبىرى ۇستاپ، زارارسىزداندىرۋ ارقىلى ءوز ورتاسىنا قايتا جىبەرۋ. ەكىنشى ءتاسىل يتتەردى قايتارىمسىز اۋلاۋ، ونىڭ دا ەكى ءتۇرى بار، ءبىرىنشى ونى ءومىر باقي باعۋ، ەكىنشىسى جانسىزداندىرۋ. ودان بولەك، زاڭ جوباسى اياسىندا بۇرالقى يتتەردىڭ سانى مەن ولاردىڭ ءقاۋپىن ازايتۋ ماسەلەسى تالقىلانىپ جاتىر»، - دەدى ەربولات ساتىبالدين «جانۋارلارعا جاۋاپكەرشىلىكپەن قاراۋ تۋرالى» زاڭعا وزگەرىستەر مەن تولىقتىرۋلار ەنگىزۋ ماسەلەسىنە ارنالعان دوڭگەلەك ۇستەل بارىسىندا.
حالىق قالاۋلىسىنىڭ ايتۋىنشا، بۇرالقى يتتەردىڭ تاعدىرىنا قاتىستى پىكىر سان الۋان.
«يتتەردى قايتارىمسىز اۋلاۋدى قولدايتىن كىسىلەر بار، ولاردىڭ دالەلدەرى بار. كەيبىرى يتتەرگە ۆاكسينا ەگىپ، زارارسىزداندىرۋ ارقىلى ءوز ورتاسىنا قايتا جىبەرۋ كەرەك دەپ سانايدى. يەسى بار يتتەرگە قاتىستى 2021 -جىلعى زاڭدا جاۋاپكەرشىلىك تۋرالى باپ بار، وكىنىشكە قاراي ول باپ قازىر جۇمىس ىستەمەي تۇر. قازىر وسى باپتى تولىقتىرۋ جاعى قارالىپ جاتىر. قازىرگى ەسەپ بويىنشا 300 مىڭداي قاڭعىباس ءيت بار دەيدى، ولاردىڭ ءبارىن ءبىر مەزەتتە اۋلاپ، زارارسىزداندىرۋعا 15 ميلليارد تەڭگەدەي قارجى قاجەت، ودان بولەك جىل سايىن ۆاكسينا ەگۋ كەرەك. سوندىقتان بيۋدجەت بويىنشا مەملەكەتكە سالماق سالماۋ جاعىن دا ويلاستىرۋىمىز كەرەك. ەڭ باستىسى ادامداردىڭ، قوعامنىڭ قاۋىپسىزدىگى»، - دەيدى ول.
ايتا كەتەيىك، بۇگىن ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى «جانۋارلارعا جاۋاپكەرشىلىكپەن قاراۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ ماسەلەلەرىنە ارنالعان دوڭگەلەك ۇستەل ءوتتى.
ەسكە سالا كەتسەك، جىل باسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ەلدى مەكەندەردە بۇرالقى يتتەردىڭ كوبەيۋى تۇرعىندارعا قاۋىپ ءتوندىرىپ جاتقانىن ايتقان ەدى.
اۆتور
داۋلەت ىزتىلەۋ