بۋرابايدا «مەن قازاقپىن» حالىقارالىق بالالار قۇرىلتايى ءوتتى
استانا. قازاقپارات - 9-شىلدەدە اقمولا وبلىسىنداعى «بالداۋرەن» رەسپۋبليكالىق وقۋ- ساۋىقتىرۋ ورتالىعىندا شەتەلدە تۇراتىن قانداس بالالارعا ارنالعان ەرەكشە شارا - «مەن Qazaqپىن» حالىقارالىق بالالار قۇرىلتايى ءوتتى. ماڭىزدى جيىنعا الەمنىڭ جەتى ەلىنەن كەلگەن 288 بالا قاتىستى.
بۇل شارا، دۇنيەجۇزى قازاقتارى قاۋىمداستىعىنىڭ ۇيىمداستىرۋىمەن، وقۋ-اعارتۋ مينيسترلىگىنىڭ قولداۋىمەن ءوتىپ وتىر.
قۇرىلتايدىڭ نەگىزگى ماقساتى - شەتەلدەگى قازاق بالالارىنىڭ تاريحي وتانىنا دەگەن سۇيىسپەنشىلىگىن ارتتىرۋ، ۇلتتىق قۇندىلىقتار مەن سالت-داستۇرلەردى تەرەڭىرەك تانۋىنا مۇمكىندىك جاساۋ. جوبا اياسىندا قاتىسۋشىلار ۇلتتىق-مادەني باعدارلاما نەگىزىندە ارنايى دايىندالعان تانىمدىق جانە تاربيەلىك ءىس-شارالارعا بەلسەنە قاتىستى.
- بۇگىن ءبىز ءۇشىن ۇلىستىڭ ۇلى كۇنى، سەبەبى 300 گە جۋىق قازاق بالاسى الەمنىڭ تۇكپىر-تۇكپىرىنەن قاسيەتتى بۋراباي جەرىندە باس قوسىپ جاتىر. قازاق ءوزى كوپ ەمەس حالىق. بۇل جوبا - ەرەكشە جوبا، كەلەشەكتىڭ جوباسى. بالالاردىڭ باسىن قوسىپ، ىنتىماقتى ەتىپ، كەلەشەكتە ەگەمەندى قازاقستاندى دامىتۋ ءۇشىن، ەلىمىزدىڭ جەرىمىزدىڭ تۇتاستىعىن نىعايتۋ ءۇشىن، قازىرگى ەڭ نەگىزگى ماسەلە جاستاردى تاربيەلەپ، جاستارعا ءتىلىمىزدى، ءدىنىمىزدى ءداستۇرىمىزدى ءارى قاراي جالعاستىرىپ، ماڭگىلىك ەل بولۋعا ۇلەس قوسۋ، - دەيدى دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ.
شاراعا جولداما العان بالالار ونەر، ءبىلىم، سپورت باعىتى بويىنشا ىرىكتەلگەن دەگەن كىل مىقتىلار.
- ءوتىنىش بىلدىرگەن قانداستاردىڭ اراسىنان ءتۇرلى سالادا جەتىستىككە جەتكەن، جۇلدەگەر جانە دارىندى بالالار ىرىكتەلدى. شارانىڭ باستى ماقساتى - شەتەلدەگى قازاق بالالارىنىڭ اتاجۇرتىمەن بايلانىسىن نىعايتۋ. قازاقتىڭ ءتىلى مەن ءداستۇرىن تەرەڭىرەك تانىپ، ءوز تامىرىن سەزىنۋگە جول اشۋ. بۇل ولاردىڭ بولاشاقتا وتانىنا ورالىپ، ەلدىڭ دامۋىنا ۇلەس قوسۋىنا ۇلكەن مۇمكىندىك بەرەدى، - دەدى دۇنيەجۇزى قازاقتارى قاۋىمداستىعى ءتوراعاسىنىڭ كەڭەسشىسى قارلىعاش بەكپاتشا قىزى.
قۇرىلتايدا ۇلتتىق قۇندىلىقتاردى دارىپتەۋمەن قاتار، بالالارعا بيزنەس، زاماناۋي كاسىپتەر مەن الەۋمەتتىك جەلىنىڭ مۇمكىندىكتەرى تۋرالى ماڭىزدى دارىستەر وقىلدى. سونداي-اق، بيىلعى باعدارلامادا ەتنومۋزىكالىق ساباقتار، ۇلتتىق اسپاپتارمەن تانىسۋ، مۋزەيلەرگە بارۋ جانە تاريحي جادىگەرلەردى زەرتتەۋ سەكىلدى باعىتتار قامتىلدى.
وسىعان دەيىن بۋرابايدا شەتەلدە تۇراتىن قازاق بالالارىنا ارنالعان ەتنولاگەر اشىلعانى تۋرالى جازدىق.
اۆتور
ريزابەك نۇسىپبەك ۇلى