«بۋراباي» ۇلتتىق پاركىنىڭ ورمان القابى 2600 گەكتارعا ۇلعايدى
كوكشەتاۋ. KAZINFORM - سوڭعى 5 جىل ىشىندە «بۋراباي» ۇلتتىق پاركىندەگى ورمان القابى 3,3 پايىزعا ۇلعايىپ، 79546-دان 82137 گەكتارعا جەتتى.
ياعني، مەملەكەتتىك ورمان ينسپەكتورلارىنىڭ قىزمەتىنىڭ ارقاسىندا جاسىل جەلەك جامىلعان جەردىڭ اۋماعى 2591 گەكتارعا كەڭەيىپ وتىر.
«بۋراباي» ۇلتتىق پاركى باسپا ءسوز قىزمەتىنىڭ مالىمەتىنشە، اعاش وتىرعىزۋ جۇمىستارى 2024 -جىلى دا جالعاسىن تاپتى. بۇل بۋراباي ورماندارىنىڭ ورماندارىن قالپىنا كەلتىرۋدىڭ ۇزاق مەرزىمدى جوسپارلارىن جۇزەگە اسىرۋداعى ماڭىزدى قادام بولدى. بيىل اقىلباي، بۋراباي، زولوتوبور، جالايىر، ميرنوە جانە پريوزەرنوە ورمانشىلىقتارىندا قىزۋ جۇمىس ءجۇرىپ، جالپى اۋدانى 104,9 گ ا جەرگە 839,2 مىڭ قاراعاي كوشەتى ەگىلدى.
«ورماندى قالپىنا كەلتىرۋ - اعاش ەگۋدەن عانا تۇرمايدى. بۇدان بولەك، وسكىنگە مۇقيات كۇتىم جاساۋ. بيىل ءبىز 333,9 گەكتار القاپتاعى كوشەتتەردىڭ ءتۇبىن ەكى مارتە قولمەن ارامشوپتەردەن ارىلتتىق. نازىك وسكىننىڭ سولىپ قالماي، بوي جازىپ ءوسىپ كەتۋىنە جاعداي جاساۋعا تىرىسامىز، كۇزگە دەيىن كۇتىپ-باپتايمىز»، - دەدى ورماندى قالپىنا كەلتىرۋ ينجەنەرى ءاليا ءابدىراحمانوۆا.
ايتۋىنشا، قولايسىز اۋا رايىنا بايلانىستى فاكتورلار جاس ورماننىڭ ءوسۋىن قيىنداتقانىمەن، ۇلتتىق پارك جىل سايىن سوعان قاراماستان ورمان اۋماعىن ۇلعايدى كوزدەيدى.
«ورمان ورتتەرى، اپتاپ ىستىق، ادامداردىڭ ەكولوگياعا قايشى ارەكەتتەرى كوشەتتەردىڭ وسۋىنە جانە ورماننىڭ تابيعي جاڭارۋىنا تەرىس اسەر ەتەدى. دەگەنمەن، ۇلتتىق پارك ۇجىمى قيىندىقتاردى جەڭىپ كەلەدى. سوڭعى 5 جىل ىشىندە ءبىز ءار جىل سايىن 65 گەكتاردان استام اۋماققا كەمى جارتى ميلليوننان كوشەت ەگىپ ءجۇرمىز. «بۋراباي» م ۇ ت پ قىزمەتى باستالعاننان بەرى جالپى اۋدانى 1400 گەكتارعا جۋىق قاراعاي مەن قايىڭنىڭ 10 ميلليوننان استام كوشەتى ەگىلدى»، - دەدى ورمان ينجەنەرى.
ايتا كەتسەك، بۇدان بۇرىن «بۋراباي» ۇلتتىق پاركىندە جانۋارلارعا قاجەتتى قىسقا جەم-ءشوپ قورى جاسالىپ جاتقاندىعىن جازعان ەدىك.
اۆتور
اسلان وسپانوۆ