بۋراباي ۇلتتىق پاركىندە جابايى جانۋارلاردىڭ سانى ەداۋىر ءوستى
كوكشەتاۋ. KAZINFORM - «بۋراباي» مەملەكەتتىك ۇلتتىق تابيعي پاركىندە جابايى جانۋارلاردىڭ سانى ەداۋىر ءوستى. جەرگىلىكتى اڭ- قۇستاردىڭ تىنىس- تىرشىلىگىن باقىلاۋ، قورعاۋ جانە ازىقتاندىرۋدى ءتيىمدى ۇيىمداستىرۋ جانۋارلار سانىنىڭ وسۋىنە قولايلى جاعداي تۋعىزىپ وتىر.
«بۋراباي» م ۇ ت پ باسپا ءسوز قىزمەتىنىڭ مالىمەتىنشە، سوڭعى 5 جىلدا بۇلانداردىڭ سانى 2,5 ەسەگە ءوسىپ، 122 باسقا جەتسە، سىلەۋسىن پوپۋلياتسياسى 4 ەسە ۇلعايىپ، 48 باستى قۇرادى. سونىمەن بىرگە، بۇعىلار 108 گە، ەلىك 25 كە، تۇلكى 14 كە كوبەيدى. بۇل ۇلتتىق پاركتىڭ عىلىمي ماماندارى جاريالاعان نەگىزگى جابايى اڭدار ساناعىنىڭ ناتيجەلەرى.
«سوڭعى جىلدارداعى قىستىڭ قاتالدىعىنا قاراماستان ۇلتتىق پارك اۋماعىندا جابايى جانۋارلاردىڭ ايتارلىقتاي كوبەيگەنى بايقالادى. بۇل ۇلتتىق پارك ۇجىمى ءۇشىن قۋانىشتى جايت. دۇرىس باعىتتا جۇمىس اتقارىپ، تابيعي رەسۋرستاردى ساۋاتتى باسقارىپ، بيوتەحنيكالىق شارالاردى ساپالى جۇزەگە اسىرىپ جاتقانىمىزدى كورسەتەدى. وسىنشا كۇش-جىگەردىڭ ارقاسىندا ەڭ قيىن كليماتتىق كەزەڭدەردە دە جانۋارلار پوپۋلياتسياسىن ساقتاۋعا بولادى»، - دەدى «بۋراباي» م ۇ ت پ جانۋارلار الەمىن قورعاۋ جانە ءوسىمىن مولايتۋ ءبولىمىنىڭ باسشىسى يۋريي زەلينسكي.
ۇلتتىق پارك ينسپەكتورلارى جانۋارلار الەمىن قورعاۋ جانە ءوسىمىن مولايتۋ ءبولىمىنىڭ ماماندارىمەن بىرلەسىپ، جانۋارلاردىڭ ءىزىن مۇقيات زەرتتەي وتىرىپ، جينالعان دەرەكتەرگە تۇراقتى مونيتورينگ، ساناق جانە تالداۋ جۇرگىزەدى. سونداي-اق، فوتوتۇزاقتار ارقىلى ەرەكشە قورعالاتىن تابيعي اۋماقتاردا ۆيزۋالدى باقىلاۋ جاسايدى. بۇل ولارعا اڭ- قۇستار پوپۋلياتسياسىن باقىلاپ، بيوتەحنيكالىق جۇمىستاردى جوسپارلاۋ ءۇشىن قاجەت.
«جانۋارلاردىڭ كوبەيگەنى - بارشا ارىپتەستەرىمىزدىڭ كۇندەلىكتى جۇمىسىنىڭ ناتيجەسى. ءبىز ءۇشىن تابيعي مۇرانى ساقتاپ قانا قويماي، ونى بولاشاق ۇرپاق يگىلىگى ءۇشىن دامىتۋ دا ماڭىزدى»، - دەپ اتاپ ءوتتى يۋ. زەلينسكي.
بيوتەحنيكالىق ءىس- شارالار جابايى تابيعات پوپۋلياتسياسىن ساقتاۋدا شەشۋشى ءرول اتقارادى. ۇلتتىق پارك ينسپەكتورلارى ازىقتاندىرۋ الاڭدارىنداعى ناۋالاردى جىل سايىن جوندەپ، جاڭارتىپ وتىرادى. بۇلاندار، بۇعىلار مەن ەلىكتەرگە جەم سالاتىن، ىق بولاتىن قالقا جاسايدى، اعاش بۇتالارىنان بۋما ازىرلەيدى، پىشەن ورادى جانە باسقا دا جەم- ءشوپ تۇرلەرىن ازىرلەيدى. بۇل جۇمىس جانۋارلاردىڭ قاتال قىس مەزگىلىندەگى تىنىس- تىرشىلىگىن ەداۋىر جەڭىلدەتەدى.
ايتا كەتسەك، بۇدان بۇرىن «بۋراباي» ۇلتتىق پاركىندە جابايى جانۋارلاردىڭ 15-تەن استام ءتۇرى مەكەندەيدى.
اۆتور
اسلان وسپانوۆ