بۇقتىرما سۋ قويماسىنداعى «قىزىل تۋ» پاروم وتكەلى ءوز جۇمىسىن تولىققاندى توقتاتتى

وسكەمەن. KAZINFORM - شىعىس قازاقستان وبلىسىنداعى بۇقتىرما سۋ قويماسىنداعى «قىزىل تۋ» پاروم وتكەلى ءوز جۇمىسىن تولىققاندى توقتاتتى.

21-قازان كۇنى مەملەكەت باسشىسىنىڭ تاپسىرماسى بويىنشا شىعىس قازاقستان وبلىسىنداعى سامار مەن كۇرشىم اۋداندارىن جالعايتىن بۇقتىرما سۋ قويماسى ارقىلى وتەتىن كوپىر اشىلدى. بۇل ەلىمىزدەگى ەڭ ۇزىن كوپىر. ۇزىندىعى - 1316 مەتر. ەكى جولاقتى كوپىر تاۋلىگىنە 80 مىڭعا دەيىن كولىك وتكىزە الادى.

بۇرىن وسى ارادا «قىزىل تۋ» پاروم وتكەلى جۇمىس ىستەيتىن. ونداعى بىرنەشە پاروم حالىقتى ارلى-بەرلى تاسيتىن. الايدا كوپىر اشىلعاننان كەيىن پارومدار قاجەتتىلىگىن جوعالتتى.

ش ق و اكىمدىگىنىڭ مالىمەتىنشە، قازىر پاروم ءوز جۇمىسىن تولىققاندى توقتاتتى. ال 60 جىلدان بەرى قولدانىستا بولعان ەكى پاروم كۇردەلى جوندەۋدى قاجەت ەتەدى. پارومدار جوندەۋدەن وتكەن سوڭ قايدا جىبەرىلەتىنى ازىرگە بەلگىسىز.

«ۆاسيليەۆ جانە وكتيابر وتكەلدەرىنىڭ جۇمىسىن جانداندىرۋ تۋرالى التاي، سامار، ۇلكەن نارىن اۋداندارىنىڭ تۇرعىندارى سۇراعان ەدى. ازىرگە ناقتى شەشىم قابىلدانعان جوق»، - دەپ حابارلادى ش ق و جولاۋشىلار كولىگى جانە اۆتوموبيل جولدارى باسقارماسىنان.

ەسكە سالساق، وسىعان دەيىن بۇقتىرماداعى كوپىرگە 100 دەن استام كامەرا قويىلعانى حابارلانعان.