بۇقتىرما سۋ قويماسىنداعى كوپىر ەكى جاعالاۋدى بىرىكتىرەدى

وسكەمەن. KAZINFORM - شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن كوپىر ەڭ ءىرى جاساندى سۋ قويماسىنىڭ ەكى جاعالاۋىن بىرىكتىرەدى.

ش ق و اقپاراتتىق ورتالىعىنىڭ مالىمەتىنە سۇيەنسەك، كوپىر جىل سوڭىنا دەيىن تولىق سالىنىپ بولعان سوڭ بۇرىن ساعاتتاپ وتۋگە تۋرا كەلگەن قاشىقتىقتى تۋرا ءتورت مينۋتتا ءجۇرىپ وتۋگە بولادى. بۇل شىعىس قازاقستان وبلىسىنىڭ التى اۋدانىنىڭ تۇرعىندارى ءۇشىن تاريحي وقيعا.

تۇرعىندار كوپىر سالىنۋىن 50 جىلدان استام ۋاقىت كۇتتى. ادامداردىڭ بۇقتىرما سۋ قويماسىنىڭ ءبىر جاعاسىنان ەكىنشى جاعاسىنا جەتۋىنىڭ تەك ءۇش جولى بولدى - پاروم، مۇزدى كەسىپ ءوتۋ جانە جەڭىل كولىكتەر ءۇشىن 570 شاقىرىمدىق، جۇك كولىكتەرى ءۇشىن 750 شاقىرىمدىق اينالما جول.

«كوپىر ءبىرىنشى كەزەكتە ءوڭىردىڭ الەۋمەتتىك- ەكونوميكالىق دامۋىنا وڭ سەرپىن بەرەدى. ءتۇرلى تاۋار باعاسى دا رەتتەلەدى، سەبەبى بۇرىن بارلىق تاۋاردىڭ باعاسىنا پارومدى تاسىمالداۋ قۇنى كىرەتىن. كوپىر ارقىلى كولىك قوزعالىسىنىڭ ىسكە قوسىلۋى قىتاي مەن رەسەي فەدەراتسياسى اراسىنداعى تاۋار اينالىمىن دا جاقسارتادى»، - دەلىنگەن مالىمەتتە.

بۇقتىرما سۋ قويماسى الەمدەگى ەڭ ءىرى بەس سۋ قويماسىنىڭ ءبىرى. ال قازاقستانداعى ەڭ ۇلكەن جاساندى سۋ قويماسى. شىعىس قازاقستان ءۇشىن بۇل ءارى قاراي دامىتۋدى قاجەت ەتەتىن ۇلكەن تۋريزم كلاستەرى. سوڭعى مالىمەتتەرگە سايكەس، جاز كەزىندە جاعالاۋعا 15 مىڭنان استام تۋريست كەلەدى.

بۇل قازاقستانداعى ەڭ ۇزىن كوپىر بولايىن دەپ تۇر. ونىڭ ۇزىندىعى - 1316 مەتر. بارلىق قۇرىلىس جۇمىستارىن شىعىس قازاقستاندىق كوپىر سالۋشىلار جۇرگىزىپ جاتىر.

«بۇقتىرما سۋ قويماسى ارقىلى وتەتىن كوپىردىڭ وتكىزۋ قابىلەتى تاۋلىگىنە 20 مىڭ كولىكتى قۇرايدى. ءبىراق ونىڭ ەكونوميكاعا، لوگيستيكاعا جانە حالىقتىڭ الەۋمەتتىك ءال-اۋقاتىنىڭ دەڭگەيىنە اسەرى الدەقايدا ماڭىزدى. قۇرىلىس جۇمىستارى وبلىس اكىمىنىڭ تۇراقتى باقىلاۋىندا»، - دەلىنگەن حابارلامادا.

اۆتور

تالعاتجان مۇحامەتبەك ۇلى