بۇقارالىق جانە وليمپيادالىق سپورت تۇرلەرىن جەتىلدىرۋدە اۋقىمدى جۇمىستار كۇتىپ تۇر - مارجىقپايەۆ

استانا. KAZINFORM - بۇگىن ەلوردادا قازاقستان رەسپۋبليكاسى تۋريزم جانە سپورت مينيسترلىگىنىڭ دەنە شىنىقتىرۋ جانە سپورت، ويىن بيزنەسى مەن لوتەرەيا قىزمەتىن رەتتەۋ سالالارىنداعى 2023-جىلعى قىزمەتى مەن 2024-جىلعا قويىلعان نەگىزگى مىندەتتەرى تۋرالى كەڭەيتىلگەن القا ءماجىلىسى ءوتتى.

باس قوسۋعا ق ر پرەمەر-ءمينيسترىنىڭ ورىنباسارى ت. دۇيسەنوۆا، تۋريزم جانە سپورت ءمينيسترى ە. مارجىقپايەۆ، ق ر پارلامەنتىنىڭ دەپۋتاتتارى، مينيسترلىككە باعىنىستى ۇيىمداردىڭ باسشىلارى، پاريجدەگى وليمپيادا جانە پاراليمپيادا ويىندارىنا دايىندىق جۇمىستارىن ۇيلەستىرۋشى شتابتىڭ، دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكسيا، وڭىرلىك سپورت باسقارلامالارىنىڭ وكىلدەرى، سپورت ارداگەرلەرى قاتىستى.

القا ماجىلىسىندە ءبىرىنشى بولىپ ءسوز العان ەرمەك مارجىقپايەۆ ەل ابىرويىن اسقاقتاتار ەلەۋلى سالانى دامىتۋ، سپورتقا بەيىم، باسەكەگە قابىلەتتى بىرەگەي ۇلت، ساليقالى ۇرپاق قالىپتاستىرۋ - ءارقايسىمىزدىڭ بورىشىمىز ەكەنىن اتاپ ءوتتى.

«مەملەكەت باسشىسى قاسىم-جومارت توقايەۆ: «بۇقارالىق سپورتتى دامىتۋ ارقىلى ءبىز ۇلتىمىزدىڭ دەنساۋلىعىن جاقسارتامىز، بۇكىل ەلىمىز ماقتان تۇتاتىن سپورت جۇلدىزدارىنىڭ جاڭا بۋىنىن تاربيەلەپ شىعارامىز» دەپ ايتقان بولاتىن. سونىمەن بىرگە سپورت سالاسىنا تۇبەگەيلى وزگەرىستەر قاجەت ەكەنىنە باسا نازار اۋدارىپ، سالانىڭ ستراتەگيالىق دامۋىنىڭ باسىم باعىتتارىن بەلگىلەپ بەردى.

مينيسترلىك الدىندا بۇقارالىق سپورتتى دامىتۋ مەن وليمپيادالىق سپورت تۇرلەرىن جەتىلدىرۋدە اۋقىمدى جۇمىستار تۇر. بۇقارالىق سپورت ساۋلىعىمىزدى نىعايتۋعا باعىتتالسا، ۇلكەن جەتىستىكتەرگە جەتەلەيتىن سپورت - ەلدىڭ وڭ ءيميدجىن قالىپتاستىرادى. وسى رەتتە، كانۆوندا جاس وسپىرىمدەردىڭ قىسقى وليمپياداسى وتكەنىن بىلەسىزدەر. قازاقستان قۇراماسى كورەيا جەرىندەگى بايراقتى باسەكەدە ەل نامىسىن ابىرويمەن قورعاپ، جانكۇيەرلەردى تاريحي جۇلدەلەرىمەن قۋانتتى. جەرلەستەرىمىز ءبىر التىن، ەكى كۇمىس مەدال جەڭىپ الدى. مۇنداي جەڭىستەر ۇزدىكسىز دايىندىق پەن قولداۋدىڭ ارقاسىندا كەلەدى. بۇل رەتتە، بىلتىر ءبىز سالانىڭ ستراتەگيالىق دامۋ باعدارىن ايقىنداپ، دەنە شىنىقتىرۋ مەن سپورتتى دامىتۋدىڭ 2029-جىلعا دەيىنگى تۇجىرىمداماسىن قابىلدادىق»، - دەدى ەرمەك مارجىقپايەۆ.

اۆتور كۇنسۇلتان وتارباي