بەنيامين نەتانياحۋ ب ۇ ۇ باس اسسامبلەياسىندا يرانعا شۇيلىكتى

استانا. KAZINFORM - يزرايل پرەمەر-ءمينيسترى بينيامين نەتانياحۋ ەگەر ەلىنە شابۋىل جاسالسا، يرانعا «قاتاڭ جاۋاپ قايتارامىز» دەپ قورقىتتى، دەپ جازادى DW.

- تەگەرانداعى تيراندارعا ايتار ءسوزىم بار: ەگەر ءسىز بىزگە شابۋىل جاساساڭىز، ءبىز دە سىزگە شابۋىل جاسايمىز. يراندا يزرايلدىڭ ۇزىن قولى جەتپەيتىن جەر جوق جانە بۇل بۇكىل تاياۋ شىعىسقا قاتىستى، - دەدى يزرايل ۇكىمەتىنىڭ باسشىسى جۇما كۇنى نيۋ-يوركتە ب ۇ ۇ باس اسسامبلەياسىندا سويلەگەن سوزىندە.

نەتانياحۋ سونداي-اق، ەل ىشىندەگى ازاماتتاردىڭ قىسىمىن جانە تەگەراننىڭ سىرتقى اگرەسسياسىن ەلەمەۋ ارقىلى يراندى تىنىشتاندىرۋعا تىرىسىپ جاتقان حالىقارالىق قاۋىمداستىقتى سىنادى.

يزرايل پرەمەر-ءمينيسترى سونىمەن قاتار حالىقارالىق قىلمىستىق سوتتىڭ باس پروكۋرورى كارىم حاندى «تازا انتيسەميتيزم» ءۇشىن ايىپتادى، ول نەتانياحۋدى تۇتقىنداۋعا وردەر سۇراپ، ونىڭ گازا سەكتورىنداعى سوعىس قىلمىستارى ءۇشىن جاۋاپتى ەكەنىن العا تارتقان.

نەتانياحۋ ءوز سوزىندە الەمدىك ۇيىمنىڭ يزرايلگە دەگەن ادىلەتسىز كوزقاراسىن ايىپتاپ، ب ۇ ۇ- نىڭ «مەنمەندىك فارسقا» اينالعانىن ايتتى.

- يزرايلدىڭ ەۆرەي مەملەكەتىنە باسقا ەلدەرمەن بىردەي قارىم-قاتىناس جاسالمايىنشا، انتيسەميتتىكتەن ارىلعانشا، ب ۇ ۇ ءادىل ويلايتىن ادامدار ءۇشىن «مەنمەندىك فارس» سانالادى، - دەدى يزرايل پرەمەر-ءمينيسترى.

ونىڭ ايتۋىنشا، يزرايل «حەزبوللانى جويۋدى جالعاستىرادى».

بەنيامين نەتانياحۋ يزرايلدىڭ «يزرايلدىكتەردى ليۆانمەن شەكاراداعى ۇيىنە قايتارۋ ءۇشىن حەزبوللانى جويۋعا تولىق قۇقىعى بار» دەپ اتاپ ءوتتى.

يزرايل ءبىر جىل بويى «كىسى توزگىسىز جاعدايعا شىداپ كەلە جاتقانىن» ايتتى.

نەتانياحۋ مىنبەرگە كوتەرىلگەن كەزدە ءبىرقاتار ەلدەن كەلگەن دەلەگاتتار زالدان شىعىپ كەتتى.