بەلگىلى جازۋشى، جۋرناليست جۇماباي شاشتاي ۇلى ومىردەن ءوتتى

استانا. KAZINFORM - قازاق پروزاسىنا «اسپانقورا»، «شال مەن جىلقى»، «قۇرالايدىڭ سالقىنى» سياقتى كلاسسيكالىق شىعارمالاردى سىيلاعان جازۋشى، ءبىرقاتار باسىلىمدا باس رەداكتور قىزمەتىن اتقارعان جۋرناليست جۇماباي شاشتاي ۇلى قايتىس بولدى.

قارالى حاباردى ءماجىلىس دەپۋتاتى جاناربەك ءاشىمجان جەتكىزدى.

«قاسيەتتى ورازانىڭ ەكىنشى كۇنى قازاقتىڭ ءبىرتۋار قالامگەرى، اسىل اعامىز جۇماباي شاشتاي ۇلى جاراتقاننىڭ قۇزىرىنا قايتىپتى. بىرنەشە بۋىنعا ۇستاز بولعان، ادال ءھام تاپ-تازا قالپىنان اينىماي، سوڭىنان ءبىر اۋىز بوتەن ءسوز ىلەستىرمەگەن جۇماعاڭ تۋرالى ايتار جاقسى اڭگىمە كوپ. جاقسىلار شەتىنەن كەتىپ جاتىر»، - دەپ جازادى ول.

جۇماباي شاشتاي ۇلى 1950-جىلى جامبىل اۋدانى جامبىل اۋىلىندا دۇنيەگە كەلگەن.

ول «كوممۋنيزم جولى» گازەتىندە، 1980-87-جىلدارى رەسپۋبليكالىق «لەنينشىل جاس»، «سوتسياليستىك قازاقستان» گازەتتەرىندە، 1987-90-جىلدارى «جالىن» جۋرنالىندا جۇمىس ىستەدى.

1990-92-جىلدارى «قازاق ءتىلى» قوعامى الماتى وبلىستىق كوميتەتى ءتوراعاسىنىڭ ورىنباسارى، 1992-96-جىلدارى «جاس الاش»، «قازاق ادەبيەتى» گازەتتەرىندە ءبولىم مەڭگەرۋشىسى، 1996-2002 -جىلدارى حالىقارالىق «زامان- قازاقستان» گازەتىنىڭ باس رەداكتورى بولدى.

2002-جىلدان قازاق راديوسىنىڭ باس رەداكتورى قىزمەتىن اتقاردى. 2008-2017 -جىلدارى «قازاق ادەبيەتى» گازەتىندە باس رەداكتور بولعان.

«تاڭ نۇرى» اتتى ۇجىمدىق جيناققا «قيادا» اتتى العاشقى پوۆەسى ەندى. 1984-جىلى شىققان « قىزىل قار» اتتى تۇڭعىش جيناعى سول كەزدەگى ساياسي باسشىلىق تاراپىنان قاتال سىنعا ىلىكتى. «جالا مەن نالا» (1987 ج)، «جىر جولبارىس» (1996 ج)، «ءبىزدىڭ زاماننىڭ اياز ءبيى» (1997 ج)، «جاڭعىرىق» رومانى (2004 ج)، تاڭدامالى 2 تومدىق جيناعى (2010 ج) جانە «اياز بي» رومانى «جازۋشى» باسپاسىنان قايتا باسىلىپ شىققان (2013 ج).

اۆتور

ورالحان قوجانوۆ