بۇل تۋرالى قازاقستان مەن بەلگيانىڭ ماڭىزدى مينەرالدارعا ارنالعان سەمينارى كۋلۋارىندا نازاربايەۆ ۋنيۆەرسيتەتىنىڭ پروفەسسورى، ەنەرگەتيكا سالاسىنداعى جاڭا ماتەريالدار مەن تەحنولوگيالار ينستيتۋتىنىڭ باس ديرەكتورى جۇماباي باكەنوۆ مالىمدەدى.
سەمينار قورىتىندىسىن 13-قازاندا بەلگيا كورولى فيليپپ پەن كوروليەۆا ماتيلداعا ارنالعان دوڭگەلەك ۇستەلدە تانىستىرۋ جوسپارلانعان.
پروفەسسوردىڭ ايتۋىنشا، قازاقستاندا پايدالى قازبالاردى وڭدەۋ تەحنولوگيالارى بولعانىمەن، ولاردىڭ ءبىرقاتارى ەسكىرگەن. ال بەلگيانىڭ KU Leuven ۋنيۆەرسيتەتى كەن بايىتۋ، گيدرومەتاللۋرگيا جانە پيرومەتاللۋرگيا باعىتتارىنداعى زەرتتەۋلەرىمەن تانىمال. بۇل سالالاردا تاجىريبەلى عالىمدار جۇمىس ىستەيدى.
- قازاقستان مەن بەلگيانىڭ، اسىرەسە KU Leuven ۋنيۆەرسيتەتى ارقىلى ىنتىماقتاستىعىنىڭ الەۋەتى زور. ءبىزدىڭ ماقساتتارىمىزدىڭ ءبىرى - قازاقستاندا ماڭىزدى مينەرالداردى زەرتتەۋ جانە وڭدەۋ بويىنشا بىرلەسكەن ورتالىقتار قۇرۋ، - دەدى جۇماباي باكەنوۆ.
مۇنداي ورتالىقتاردا ەكى ەلدىڭ ماماندارى ماڭىزدى مينەرالداردى ءوندىرۋ، بايىتۋ جانە وڭدەۋ تەحنولوگيالارىن بىرلەسىپ ازىرلەي الادى. سونىمەن قاتار قازاقستاندىق ستۋدەنتتەردىڭ بەلگيادا ءبىلىم الۋىنا جانە قوس ديپلوم باعدارلامالارىنا قاتىسۋىنا مۇمكىندىك جاساۋ جوسپارلانىپ وتىر.
- قازاقستاندىق جانە بەلگيالىق ستۋدەنتتەردىڭ ەكى ۋنيۆەرسيتەتتە قاتار ءبىلىم الىپ، قوس ديپلوم الۋ باعدارلامالارىن تالقىلاعىمىز كەلەدى. عىلىمي زەرتتەۋلەر مەن بىرلەسكەن ورتالىقتاردى قۇرۋ جۇمىسىن جەدەلدەتۋگە نيەتتىمىز. بەلگيالىق ارىپتەستەر دايىن بولسا، كەلىسىمدەرگە قول قويىپ، ورتالىقتار اشۋعا جانە ولاردى بىرلەسىپ قارجىلاندىرۋعا ءازىرمىز، - دەدى پروفەسسور.
قازاقستاننىڭ ماقساتى - مينەرالداردى تەك ءوندىرىپ، شيكىزات كۇيىندە ساتۋمەن شەكتەلمەي، ولاردى ەل ىشىندە تولىق وڭدەپ، دايىن ءونىم شىعارۋ. اتاپ ايتقاندا، وتاندىق شيكىزات نەگىزىندە اسقىن وتكىزگىشتەر، جارتىلاي وتكىزگىشتەر، كاتاليزاتورلار مەن ماگنيتتەر ءوندىرۋ مۇمكىندىكتەرى قاراستىرىلىپ وتىر.
ايتا كەتەيىك، قازاقستان قازىردىڭ وزىندە بەلگياعا موليبدەن كەندەرى مەن تيتان ەكسپورتتايدى.
بۇعان دەيىن بەلگيالىقتار كورولى فيليپپ قازاقستاننىڭ باي تاريحىمەن جانە مادەنيەتىمەن جاقىن تانىسۋعا نيەتتى ەكەنىن ايتقان ەدى.
ءوز كەزەگىندە مەملەكەت باسشىسى قاسىم-جومارت توقايەۆ قازاقستان مەن بەلگيا اراسىندا شەشىلمەگەن ماسەلە جوق ەكەنىن مالىمدەدى.