بەلگيالىق اسىراپ العان جانىبەكتىڭ اناسى قايتىس بولدى

استانا. KAZINFORM - جانىبەكتى باۋىرىنا باسقان بەلگيالىق اناسى 54 جاسىندا ومىردەن وزدى. بۇل تۋرالى جانىبەك جۇماعۇلوۆتىڭ قازاقستانداعى رەسمي وكىلى قىمبات دوسجان ءمالىم ەتتى.

«دوستار، جانىبەكتى اسىراپ العان ۆالەري اناسى بۇل ومىرمەن قوش ايتىستى. ەۆتانازيا تاسىلىمەن(ەۆتانازيا - اۋىر ازاپتى باستان كەشىرىپ جاتقان ادامداردىڭ ءولىمىن تەزدەتۋ - رەد.). 20 جىلدان بەرى جانىبەكتىڭ اناسى بولعان، ءوزى اۋىرسا دا، مەيىرىمىن جانىبەككە بەرە بىلگەن ۆالەريدىڭ ماڭگىلىك ءومىرى ەندى باستالدى. 54 جاس. جانىبەك بەرىك بول…»، - دەلىنگەن قىمبات دوسجاننىڭ Instagram پاراقشاسىندا.

جەلىدەگى جازبانىڭ استىنا جانىبەك «مەنى قولداعان تۋعان ەلىمدەگى ءاربىر وتباسىنا العىس ايتامىن. مەن سىزدەردى جاقسى كورەمىن. جاقىندا سىزدەرمەن تاعى قاۋىشۋعا اسىقپىن»، - دەگەن پىكىر قالدىرعان.

ايتا كەتسەك، وتانداسىمىز بۇعان دەيىن اسىراپ العان اناسىنىڭ دەنساۋلىعى ناشارلاپ، قاتتى قينالىپ جاتقانىن ايتقان ەدى.

ەسكە سالا كەتەيىك، بيىل قاڭتاردا بەلگيا ازاماتى اسىراپ العان 22 جاستاعى جانىبەك جۇماعۇلوۆ (دجاني) قازاقستاندا تۋعان اناسىن ىزدەپ كەلگەنى تۋرالى جازعان ەدىك. وتانداسىمىزدىڭ اناسىن ىزدەستىرۋ جۇمىستارىنىڭ بارىسىمەن جانىبەك جۇماعۇلوۆتىڭ قازاقستانداعى رەسمي وكىلى قىمبات دوسجان ايتىپ بەردى.

سونداي-اق، قازاقستانعا قايتا كەلگەن بەلگيالىق جانىبەك جۇماعۇلوۆ استاناداعى بالالار ۇيىنە باردى.

ودان بولەك، ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ اتالعان جايتقا قاتىستى قىلمىستىق ءىس قوزعالىپ، وتانداسىمىزدىڭ اتا-اناسى ىزدەستىرىلىپ جاتقانىن جەتكىزدى.

اۆتور
داۋلەت ىزتىلەۋ