بەلارۋس ەلەكتروندى ۆيزا جۇيەسىن ەنگىزەدى

استانا. KAZINFORM - بەلارۋستە 67 ەلدىڭ ازاماتتارى ءۇشىن ەلەكتروندى ۆيزا جۇيەسى ەنگىزىلەدى. بۇل تۋرالى شينحۋا اقپارات اگەنتتىگى حابارلادى.

بۇل بەيسەنبى كۇنى بەلارۋستىڭ ۇلتتىق قۇقىقتىق ينتەرنەت-پورتالىندا رەسمي جاريالانعان مينيسترلەر كەڭەسىنىڭ قاۋلىسىندا قاراستىرىلعان. جاڭا قاۋلى جاريالانعاننان كەيىن ءۇش اي وتكەن سوڭ قولدانىسقا ەنگىزىلەدى.

قاۋلىعا سايكەس، ەلەكتروندى ۆيزالار «كونسۋل» اۆتوماتتاندىرىلعان جۇيەسىندە بەرىلەدى.

ەلەكتروندى ۆيزالار ا ق ش، كانادا، اۋستراليا، جاپونيا، اۋستريا، جاڭا زەلانديا، بەلگيا، ۇلى بريتانيا، يسپانيا، لاتۆيا، ليتۆا، پولشا سياقتى 67 ەلدىڭ تۇراقتى ءتولقۇجات يەلەرىنە بەرىلەدى. مۇنداي ۆيزانى الۋ ءۇشىن بەلارۋستىڭ ەلەكتروندى قىزمەتتەرىنىڭ ءبىرىڭعاي پورتالىنداعى جەكە كابينەتتە ءوتىنىش بەرۋ قاجەت. ءوتىنىش كۇنتىزبەلىك جەتى كۇن ىشىندە قارالادى. ەلەكتروندى ۆيزالار شۇعىل تۇردە بەرىلمەيدى.

ءبىر رەتتىك جانە جەكە ەلەكتروندى ۆيزالار 30 كۇننەن اسپايتىن مەرزىمگە بەرىلەدى. ساپاردىڭ ماقساتىنا قاراي ۆيزالاردىڭ كەلەسى ساناتتارى بەرىلەدى: ءىسساپار، سپورتتىق، مادەني، عىلىمي، ءبىلىم بەرۋ ءىس- شارالارىنا جانە تاعىلىمدامادان وتۋگە قاتىسۋ، جەكە ىستەر، تۋريزم.

ەسكە سالساق، بۇدان بۇرىن بەلارۋس وسك پرەزيدەنتتىككە كانديدات رەتىندە تىركەۋ ءۇشىن الەكساندر لۋكاشەنكونىڭ قۇجاتتارىن قابىلداعانى حابارلاندى.