بۇل تۋرالى بەلارۋس مەملەكەتتىك اسكەري-ونەركاسىپ كوميتەتىنىڭ ءتوراعاسى دميتريي پانتۋس «بەلارۋس-1» تەلەارناسىنا بەرگەن سۇحباتىندا مالىمدەدى.
ونىڭ ايتۋىنشا، قازىرگى اسكەري ونەركاسىپتىڭ باستى باعىتتارىنىڭ ءبىرى - ۇشقىشسىز ۇشۋ اپپاراتتارىنا قارسى ءتيىمدى قورعانىس جۇيەلەرىن ازىرلەۋ.
- بۇگىندە ءبىزدىڭ سالاداعى نەگىزگى باعىت، ارينە، ۇشقىشسىز ۇشۋ اپپاراتتارىنا قارسى كۇرەس بولىپ وتىر. بۇل رەتتە بەلگىلى ءبىر جەتىستىكتەرگە قول جەتكىزدىك. ماسەلەن، ءوز ەلىمىزدە جاسالعان «شافران» لازەرلىك كەشەنى قارۋ-جاراق قاتارىنا ءساتتى قابىلداندى. قازىر ونىڭ قۋاتىن، ارەكەت ەتۋ قاشىقتىعىن جانە باسقا دا تاكتيكالىق-تەحنيكالىق سيپاتتامالارىن جاقسارتۋ ءۇشىن جاڭعىرتۋ جۇمىستارىن جالعاستىرىپ جاتىرمىز، - دەدى دميتري پانتۋس.
كوميتەت مالىمەتىنشە، «شافران» كەشەنى اۋە كەڭىستىگىن راديولوكاتسيالىق جانە وپتيكالىق-ەلەكتروندىق قۇرالدار ارقىلى باقىلاي الادى. ول 4500 مەترگە دەيىنگى قاشىقتىقتان درونداردى انىقتاپ، قۋاتتى لازەر ساۋلەسىنىڭ كومەگىمەن 1500 مەترگە دەيىنگى ارالىقتا جويا الادى.
2025 -جىلدىڭ قاراشاسىندا كەشەن سىناقتان ءساتتى ءوتىپ، تيىمدىلىگىن راستاعان بولاتىن.
دميتريي پانتۋستىڭ ايتۋىنشا، بەلارۋس راديوەلەكتروندىق كۇرەس قۇرالدارىن جەتىلدىرۋگە دە ەرەكشە نازار اۋدارىپ وتىر. سوڭعى التى ايدا تومەن بيىكتىكتە ۇشاتىن نىسانداردى انىقتايتىن وتاندىق ەكى زاماناۋي ستانسيا اسكەردىڭ قارۋ-جاراق قاتارىنا ەنگىزىلگەن.
ال ەلدىڭ قورعانىس ءمينيسترى ۆيكتور حرەنين دروندارعا قارسى كۇرەس قۇرالدارىنىڭ ماڭىزى ارتىپ كەلە جاتقانىن اتاپ ءوتتى.
- بۇرىن ويىنشىق رەتىندە قابىلدانعان دروندار بۇگىندە ۇرىس دالاسىندا كوپتەگەن مىندەتتى اتقاراتىن اسا قاۋىپتى قارۋعا اينالدى. ولارعا قارسى ءتيىمدى كۇرەسۋدىڭ جولىن قازىر بۇكىل الەم ىزدەپ جاتىر. ءبىزدىڭ عالىمدارىمىز بەن وندىرۋشىلەرىمىز دە وسى باعىتتا جۇمىس جۇرگىزۋدە، - دەدى مينيستر.
ونىڭ سوزىنشە، مۇنداي قورعانىس جۇيەلەرى ءبىر مەزگىلدە ونداعان مىڭ درون قولدانىلۋى مۇمكىن جاعدايلارعا دايىن بولۋ ءۇشىن قاجەت.
ايتا كەتەيىك، بۇعان دەيىن يزرايل عارىش كەڭىستىگىنەن نىسانالارعا سوققى جاساۋعا مۇمكىندىك بەرەتىن لازەرلىك قارۋ جۇيەسىن ازىرلەپ جاتقانى حابارلانعان بولاتىن.