بۇل وقۋ جىلىن ەلدەگى نەشە مەكتەپ سىرتتاعى دارەتحانامەن قارسى الادى؟
استانا. KAZINFORM - وقۋ-اعارتۋ ءمينيسترى عاني بەيسەمبايەۆقا استاناداعى اۋىل مەكتەپتەرى پەداگوگتەرىنىڭ رەسپۋبليكالىق فورۋمىنان كەيىن مەكتەپ دارەتحانالارىن بىرىزدەندىرۋ ماسەلەسى تۋرالى پىكىر ءبىلدىردى.
«بۇل وقۋ جىلىن ەلدەگى نەشە مەكتەپ سىرتتاعى دارەتحانامەن قارسى الادى؟ وسى وقۋ جىلىنىڭ اياعىنا دەيىن ول مەكتەپتەردىڭ ءبارى جىلى دارەتحانامەن قامتي الاسىزدار ما؟»، - دەپ سۇرادى ب ا ق وكىلى مينيستردەن.
عاني بەيسەمبايەۆ بۇل ماسەلە اسىرەسە تۇركىستان وبلىسىندا وزەكتى ەكەنىن ايتتى.
«ستاتيستيكاعا سۇيەنسەك، وسىدان ءۇش جىل بۇرىن ەلدەگى 3 مىڭعا جۋىق مەكتەپتىڭ ءدارتحاناسى سىرتتا ورنالاسقان ەدى. بۇگىن سولاردىڭ سانى 10عا دەيىن ازايدى. ولار نەگىزىنەن تۇركىستان وبلىسىندا شوعىرلانعان. مۇنىڭ نەگىزگى سەبەپتەرىنىڭ ءبىرى - ەشقانداي كوممۋنيكاتسيالىق ينفراقۇرىلىم جوق. نە كارىزى، نە سۋى جوق شاعىن جيناقتى مەكتەپتەر بولىپ ەسەپتەلەدى. جەرگىلىكتى ورگاندار ولاردىڭ ماسەلەسىن سۋ ساقتايتىن ۇلكەن كولەمدى ىدىستار ورناتىپ، «سەپتيك» تارتۋ ارقىلى شەشۋ ماسەلەسىن زەرتتەپ جاتىر»، - دەدى ول.
سونداي-اق، مينيستر عيمارات ىشىنە جىلى دارەتحانا ورناتسا دا، سىرتتاعى دارەتحانانى ساقتاپ وتىرعان مەكتەپتەر بار ەكەنىن ايتادى.
«بۇدان بولەك ىشتە جىلى دارەتحاناسى بولسا دا، سىرتتاعى دارەتحانانى جاپپاعان مەكتەپتەر بار. ياعني، كونسەرۆاتسيا جاساپ، توقتاتىپ قويعان مەكتەپتەر بار ەكەنىن ءبىلىپ وتىرمىز. اكىمدىكتەر ول دارەتحانالار قانداي دا ءبىر جاعدايلار ءۇشىن رەزەرۆتە تۇرۋ كەرەك دەگەن ۋاجبەن، تولىققاندى جويماۋدى سۇراپ وتىر. دەي تۇرعانمەن ءبىزدىڭ تەكسەرىستەر اپاتتىق جاعداي بولعاننىڭ وزىندە جىلى دارەتحانالاردىڭ جابىلۋىنا جول بەرمەۋگە جۇمىس ىستەيدى. ول دارەتحانالاردىڭ وقۋشى سانىنا سايكەس بولۋىن دا قاتاڭ قاداعالايمىز.
ارينە، بۇل قارجىلىق شىعىندارعا تاۋەلدى بولعاندىقتان كەيبىر جۇمىستار كەيبىر وڭىرلەردە باياۋ ءجۇرۋى مۇمكىن. بۇل ماسەلەنى 100 پايىز ورىنداۋ ءۇشىن وقۋ-اعارتۋ مينيسترلىگى ۇنەمى نازاردا ۇستاپ كەلەدى»، - دەدى عاني بەيسەمبايەۆ.