بۇكىل الەمدىك شالا تۋعان بالالار كۇنىنە وراي ءىس-شارا ءوتتى

17-قاراشا - بۇكىل الەمدىك شالا تۋعان بالالار كۇنى. بۇل كۇن مەرزىمىنەن بۇرىن بوسانۋ جانە شالا تۋعان بالالار ماسەلەسىنە نازار اۋدارتۋ ءۇشىن جىل سايىن دۇنيە جۇزىندە اتالىپ وتىلەدى، دەپ حابارلايدى Kazinform.

مەرەكە 2011 -جىلى ەۋروپالىق جاڭا تۋعان نارەستە كۇتىمى قورى (European Foundation for the Care of Newborn Infants, EFCNI) ، «Little Big Souls» افريكا ەلدەرىنە كومەك كورسەتۋ حالىقارالىق قورى، سونداي-اق اۋستراليانىڭ «شالا تۋعان نارەستەلەردىڭ انالارى» ۇلتتىق قورىنىڭ باستاماسىمەن قۇرىلدى. بۇكىل الەمدىك مەرەكەنىڭ نەگىزى قالانعاننان باستاپ ەلۋدەن استام ەل، سونىڭ ىشىندە قازاقستان دا قوسىلدى.

2023 -جىلدىڭ 17-قاراشاسىندا وسى مەرەكەگە وراي University Medical Center- دە اشىق ەسىك كۇنى ءوتىپ، كىشكەنتاي پاتسيەنتتەرگە ەرەكشە كوڭىل ءبولىندى. تاڭەرتەڭنەن باستاپ ءبىزدىڭ ورتالىقتا ەمدەلىپ شىققان بالالار UMC دياگنوستيكالىق ورتالىعىندا پەدياتر، نەۆروپاتولوگ، گاستروەنتەرولوگ، كارديولوگ، وفتالمولوگ، حيرۋرگ جانە وتولارينگولوگ ماماندارىنىڭ قابىلداۋىنان، تەكسەرۋىنەن، زەرتتەۋلەرى مەن كونسۋلتاتسياسىنان ءوتتى.

UMC

تۇستەن كەيىن بارلىق قاتىسۋشى ءۇشىن UMC انا مەن بالا ورتالىعىنىڭ دارىگەرلەرىنىڭ قاتىسۋىمەن پاتسيەنتتەر مەكتەبى ۇيىمداستىرىلدى. وندا ماماندار شالا تۋعان بالالاردىڭ كۇتىمى مەن ىقتيمال اسقىنۋلار تۋرالى بايانداپ بەردى.

ءىس-شاراعا پروفەسسور جانە مەديتسينا عىلىمدارىنىڭ دوكتورى، قازاقستانداعى نەوناتولوگيا كافەدراسىنىڭ ءبىرىنشى مەڭگەرۋشىسى تامارا قۇرمانعالي قىزى چۋماكوۆا قۇرمەتتى قوناق رەتىندە قاتىستى.

فوتو: UMC

مەرەكە سوڭى كونتسەرتتىك باعدارلاماعا ۇلاستى. وعان پاتسيەنتتەر مەن اتا-انالار قاتىسىپ، UMC انا مەن بالا ورتالىعىنىڭ نەوناتولوگيا، نەوناتالدىق حيرۋرگيا، نارەستەلەر رەانيماتسياسى جانە قارقىندى تەراپياسى بولىمدەرىنىڭ مەديتسينالىق قىزمەتكەرلەرىنە العىسىن ايتتى.