ولجاس بەكتەنوۆتىڭ مالىمدەۋىنشە، قازىر قۇقىق قورعاۋ ورگاندارى جەكەلەگەن لاۋازىمدى تۇلعالارعا قاتىستى تەرگەۋ ارەكەتتەرىن جۇرگىزىپ جاتىر. ءىستىڭ بارلىق ءمان-جايى تەرگەۋ بارىسىندا انىقتالادى. بۇل رەتتە پرەزيدەنت جاعدايدى باقىلاۋىندا ۇستاپ وتىر.
پرەمەر-مينيستر قۇزىرەتتى ورگاندار تەرگەۋدى زاڭ تالاپتارىن ساقتاي وتىرىپ، وبەكتيۆتى ءارى جان-جاقتى جۇرگىزۋگە ءتيىس ەكەنىن اتاپ ءوتتى.
ونىڭ سوزىنشە، قازىرگى جاعداي ناقتى ءبىر وقيعاعا قاتىستى. سوندىقتان ونى قوردىڭ بۇكىل كومپانيالار توبىنىڭ جۇمىسىنا كۇمان كەلتىرۋگە نەگىز رەتىندە قاراستىرۋعا بولمايدى.
بەكتەنوۆ جاقىن ارادا «سامۇرىق- قازىنا» ا ق باسقارماسىنىڭ جاڭا ءتوراعاسى تاعايىندالاتىنىن ايتتى. باسشىلىق اۋىسقانىنا قاراماستان، باسقارۋ ساباقتاستىعى مەن قور جۇمىسىنىڭ ۇزدىكسىزدىگى ساقتالادى.
- قور توبىنا كىرەتىن بارلىق كومپانيالار شتاتتىق رەجيمدە جۇمىسىن جالعاستىرىپ جاتىر. قوردىڭ دامۋ ستراتەگياسى وزگەرىسسىز قالادى. ينۆەستيتسيالىق جانە ينفراقۇرىلىمدىق جوبالاردى ىسكە اسىرۋ بەكىتىلگەن جوسپارلارعا سايكەس جالعاسادى. ينۆەستورلار، كرەديتورلار، بانكتەر جانە حالىقارالىق قارجى ينستيتۋتتارى الدىنداعى بارلىق قارجىلىق، شارتتىق جانە بورىشتىق مىندەتتەمەلەر ۋاقتىلى ءارى تولىق كولەمدە ورىندالادى، - دەدى ۇكىمەت باسشىسى.
پرەمەر-مينيستر ورىن العان جاعداي كورپوراتيۆتىك باسقارۋدى جەتىلدىرۋدى جانە سىبايلاس جەمقورلىق تاۋەكەلدەرىنىڭ الدىن الۋ شارالارىن كۇشەيتۋدى تالاپ ەتەتىنىن ايتتى.
وسىعان بايلانىستى قوردىڭ جانە ەنشىلەس ۇيىمدارىنىڭ ديرەكتورلار كەڭەستەرى مەن ولاردىڭ جانىنداعى كوميتەتتەردىڭ، اسىرەسە اۋديت جانە تاۋەكەلدەردى باسقارۋ كوميتەتتەرىنىڭ ءرولىن ارتتىرۋ كوزدەلگەن.
ىشكى باقىلاۋ، كومپلاەنس جانە ىشكى اۋديت تەتىكتەرى دە قايتا قارالادى. سىبايلاس جەمقورلىقتىڭ الدىن الۋ، مۇددەلەر قاقتىعىسىن انىقتاۋ، شەشىمدەردىڭ اشىقتىعىن ارتتىرۋ جانە باسشىلاردىڭ جەكە جاۋاپكەرشىلىگىن كۇشەيتۋگە باسىمدىق بەرىلەدى.
- ءبىزدىڭ مىندەتىمىز تەك ناقتى قۇقىق بۇزۋشىلىقتارعا دەن قويۋمەن شەكتەلمەيدى. ەڭ باستىسى، مۇنداي جاعدايلاردىڭ قايتالانۋىنا جول بەرمەيتىن ءتيىمدى جۇيە قالىپتاستىرۋ، - دەدى بەكتەنوۆ.
ەسكە سالايىق، بۇعان دەيىن ۇ ق ك «سامۇرىق- قازىنا» مەن ق ت ج باسشىلارى ۇستالعانىن راستاعان ەدى.