ۇكىمەتتىڭ باسپا ءسوز قىزمەتىنىڭ حابارلاۋىنشا، وندىرىستىك تاۋەكەلدەردىڭ الدىن الۋدىڭ زاماناۋي تەحنولوگيالارىن جانە سيفرلىق باقىلاۋ جۇيەلەرىن ەنگىزۋگە نازار اۋدارىلدى.
جوبا وتاندىق تاۋ-كەن مەتاللۋرگيا سالاسىنداعى ەڭ ءىرى جوبالاردىڭ ءبىرى بولىپ سانالادى. شاحتا 2024-جىلدىڭ جەلتوقسانىندا پرەزيدەنت قاسىم-جومارت توقايەۆتىڭ قاتىسۋىمەن ىسكە قوسىلدى.
شاحتا ميلليوننوە جانە الماز-جەمچۋجينا كەن ورىندارىن جانە التى جەراستى گوريزونتىن قامتيدى. ونىڭ اۋماعىندا ۇزىندىعى ءبىر شاقىرىمنان اساتىن قازاقستانداعى ەڭ تەرەڭ شاحتا وقپانى ورنالاسقان. ءوندىرىس جىلىنا 7 ميلليون توننادان استام كەن وندىرۋگە قاۋقارلى. جوبانى جۇزەگە اسىرۋعا سالىنعان ينۆەستيتسيالار شامامەن 1 تريلليون تەڭگەگە باعالانادى. 1,8 مىڭ جۇمىس ورنى اشىلدى.
«قازحروم» ترانسۇلتتىق كومپانياسى» ا ق باس ديرەكتورى ەرجان ابدۋلابەكوۆ قولدانىستاعى كەن ءوندىرۋ تەحنولوگيالارى مەن ونەركاسىپتىك قاۋىپسىزدىكتى قامتاماسىز ەتۋ شارالارى تۋرالى باياندادى. مەملەكەت باسشىسى جاريالاعان سيفرلاندىرۋ جانە جاساندى ينتەللەكت جىلى اياسىندا ءوندىرىستىڭ تيىمدىلىگىن ارتتىرۋعا باعىتتالعان سيفرلىق شەشىمدەر ەنگىزىلۋدە. شاحتادا قول ەڭبەگىنىڭ ۇلەسىن ازايتۋعا جانە ەڭبەك ونىمدىلىگىن ارتتىرۋعا مۇمكىندىك بەرەتىن زاماناۋي، جوعارى ءونىمدى كەن ءوندىرۋ جۇيەلەرى مەن وزدىگىنەن جۇرەتىن ارنايى تەحنيكا قولدانىلادى. پەرسونال مەن جابدىقتىڭ ورنالاسقان جەرىن باقىلاۋ ءۇشىن ينتەللەكتۋالدى جەراستى پوزيتسيالاۋ جۇيەسى قولدانىلادى. تەحنولوگيالىق شەشىمدەردى ازىرلەۋ ءۇشىن قازاقستان مەن شەت ەلدەردىڭ سالالىق عىلىمي ۇيىمدارى تارتىلىپ، گازسىزداندىرۋ جوباسى ازىرلەندى. ونەركاسىپتىك قاۋىپسىزدىك جۇيەسىن جەتىلدىرۋ جونىندەگى جۇمىس عىلىمي زەرتتەۋلەردى، سيفرلىق مودەلدەۋدى جانە زاماناۋي ينجەنەرلىك شەشىمدەردى ەنگىزۋدى قامتيدى.
شاحتانى ارالاۋ بارىسىندا پرەمەر-مينيستر ونەركاسىپتىك قاۋىپسىزدىك جانە ەڭبەكتى قورعاۋ ماسەلەلەرىنە نازار اۋداردى. بۇرىن انىقتالعان بۇزۋشىلىقتار مەن اپاتتاردى ەسكەرە وتىرىپ، ولجاس بەكتەنوۆ وندىرىستىك نىسانداردا بەلگىلەنگەن تالاپتاردىڭ ساقتالۋىن باقىلاۋدى كۇشەيتۋدى، جابدىقتىڭ ءتيىستى تەحنيكالىق جاي-كۇيىن قامتاماسىز ەتۋدى جانە جازاتايىم وقيعالاردىڭ الدىن الۋ بويىنشا قوسىمشا شارالار قابىلداۋدى تاپسىردى. قاۋىپسىز ەڭبەك جاعدايلارىن جاساۋ جانە قىزمەتكەرلەردىڭ ءومىرى مەن دەنساۋلىعى ءۇشىن تاۋەكەلدەردى ازايتۋ بويىنشا كاسىپورىن باسشىلارىنىڭ دەربەس جاۋاپكەرشىلىگى اتاپ ءوتىلدى.
- مەملەكەت باسشىسى قوعامدىق جانە ەكونوميكالىق ءومىردىڭ بارلىق سالاسىندا «زاڭ مەن ءتارتىپ» كونستيتۋتسيالىق قاعيداتىن نىعايتۋ ساياساتىن جۇيەلى تۇردە جۇزەگە اسىرىپ كەلەدى. ونەركاسىپ سالاسىندا بۇل، ەڭ الدىمەن، - قاۋىپسىزدىك تالاپتارىن مۇلتىكسىز ساقتاۋ جانە قىزمەتكەرلەردىڭ ءومىرى مەن دەنساۋلىعى ءۇشىن كاسىپورىن باسشىلارىنىڭ جاۋاپكەرشىلىگى. وقيعالار ورىن العاننان كەيىن ارەكەت ەتۋدەن بۇرىن تاۋەكەلدەردىڭ الدىن الۋدىڭ جۇيەلى تاسىلىنە كوشىپ، باقىلاۋدىڭ تسيفرلىق قۇرالدارىن بەلسەندى تۇردە ەنگىزۋ قاجەت. ەڭبەك قاۋىپسىزدىگى ءاربىر كاسىپورىننىڭ وندىرىستىك مادەنيەتىنىڭ اجىراماس بولىگىنە اينالۋعا ءتيىس، - دەپ اتاپ ءوتتى ولجاس بەكتەنوۆ.
جالپى قازاقستاندا توتەنشە جاعدايلار مينيسترلىگى ونەركاسىپتىك قاۋىپسىزدىكتى باقىلاۋدى سيفرلاندىرۋ بويىنشا دايەكتى جۇمىس جۇرگىزۋدە. ۆەدومستۆونىڭ احۋالدىق ورتالىعىنا تاۋلىك بويى «Karaganda Komir» ج ش س، «قازاقمىس كورپوراتسياسى» ج ش س، «شالقيا سينك LTD» ا ق جانە «قازحروم» تۇك» ا ق ءدوڭ تاۋ-كەن بايىتۋ كومبيناتى فيليالىنىڭ 20 شاحتاسى مەن كەنىشىنەن پوزيتسيالاۋ جانە بەينەمونيتورينگ جۇيەلەرىنىڭ دەرەكتەرى كەلىپ تۇسەدى. بۇل ناقتى ۋاقىت رەجيمىندە جۇمىسشىلار مەن تەحنيكالاردىڭ ورنالاسقان جەرىن باقىلاۋعا، كەنىش اۋاسىنىڭ جاي-كۇيىن باقىلاۋعا، قاۋىپتى فاكتورلاردى انىقتاۋعا جانە جەدەل حابارلاۋ سيگنالدارىن ىسكە قوسۋعا مۇمكىندىك بەرەدى.