ەڭبەكقورلىعى مەن تاباندىلىعى ونى جەڭىسكە جەتەلەدى - الەكساندرا لەنىڭ اناسى

الماتى. KAZINFORM - پنيەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپايەۆ پەن الەكساندرا لە پاريج وليمپياداسىنىڭ قولا جۇلدەسىن جەڭىپ الدى.

بۇل - قازاقستاننىڭ پاريج وليمپياداسىنداعى العاشقى جۇلدەسى. وسىعان وراي Kazinform ءتىلشىسى الەكساندرا لەنىڭ اناسى تاتيانا كوپەيكومەن تىلدەسىپ، مەرگەن قىزدىڭ جەڭىسى تۋرالى وي-پىكىرىن ءبىلدى.

تاتيانا كوپەيكو ەڭ الدىمەن قازاقستاندىق مەرگەندەردى جارىسقا دايىنداعان جاتتىقتىرۋشىلارعا العىس ايتتى.

- بويىمدى قۋانىش سەزىمى كەرنەپ بارادى. بالالار جۇلدەنى جەڭىپ الدى. بۇل - وتە مىقتى كوماندا. جەڭىسكە جاتتىقتىرۋشىلاردىڭ سىڭىرگەن ەڭبەگى وراسان. ولگا ۆياچەسلاۆوۆنا - وتە مىقتى، تالاپشىل باپكەر. ول كىسىگە شىن جۇرەكتەن العىس ايتامىن، - دەدى ول.

الەكساندرا لەنىڭ اناسى قىزى پاريجگە جاقسى دايىندىقپەن بارىپ، جارىس الدىندا اسا قاتتى ۋايىمداماعانىن اتاپ ءوتتى.

- ءبىر ساتكە بولسا دا دايىندىعىن توقتاتقان ەمەس. ءتىپتى جاتتىعۋىن باستاماس بۇرىن ماعان: « اناشىم، مەن جاتتىعۋىمدى جاساپ، دايىندالۋىم كەرەك» دەپ ايتاتىن. مەنىڭ قىزىم ماقساتىنا جەتپەي تىنىم تاپپايدى. ەڭبەكقورلىعى مەن تاباندىلىعى ونى جەڭىسكە جەتەلەدى دەپ ويلايمىن. جارىسقا قاتىسار كەزدە قاتتى ۋايىمداعان جوق، وزىنە سەنىمدى بولدى، - دەدى ول.

تاتيانا كوپەيكونىڭ ايتۋىنشا، ول الەكساندرا نىسانا كوزدەۋ سپورتىنا بارعان ساتتەن باستاپ وليمپياداعا بارۋدى ارمانداعان.

- الەكساندرا 4-5 سىنىپتا وقىپ جۇرگەندە وسى سپورت تۇرىمەن اينالىسا باستادى. ءبىرىنشى جارىستارىنا شىعىپ، ۇزدىك ناتيجە كورسەتە باستاعاندا العاشقى باپكەرىنە « ءبىز ءالى وليمپياداعا بارامىز» دەپ ايتقانىم بار. بۇل ارمانىمىز ورىندالدى، - دەپ قۋانىشىن جەتكىزدى وليمپيادا جۇلدەگەرىنىڭ اناسى.

ەسكە سالا كەتەيىك، بۇعان دەيىن نىسانا كوزدەۋدەن پاريج وليمپياداسىندا ەل قورجىنىنا العاشقى جۇلدە تۇسكەنىن جازعان ەدىك. پنيەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپايەۆ پەن الەكساندرا لە وليمپيادانىڭ قولا جۇلدەسىن جەڭىپ الدى.

اۆتور

دوسبول اتاجان