بەك ەير ۇشاعىنىڭ اپاتىنا بايلانىستى قىلمىستىق ءىس قايتا قوزعالادى

استانا. قازاقپارات - 2019 -جىلى الماتى ماڭىندا Bek Air اۋە كومپانياسىنىڭ ۇشاعى اپاتقا ۇشىراعان بولاتىن. وسى قايعىلى وقيعاعا بايلانىستى قىلمىستىق ءىس بويىنشا قايتادان تەرگەۋ جۇرگىزىلەدى. بۇل اقپاراتتى ۇكىمەت ۇيىندە ءوتىپ جاتقان باسپا ءسوز ءماسليحاتىندا كولىك ءمينيسترى نۇرلان ساۋرانبايەۆ راستادى.

- وكىنىشكە قاراي، اۆياتسيادا مۇنداي جاعدايلار ءجيى بولىپ تۇرادى جانە تۇپكىلىكتى شەشىم تابۋ وتە قيىنعا سوعادى. اۆياتسيالىق اپات وتە ۇزاق قارالادى. قازىرگى ۋاقىتتا بارلىق قۇجاتى دايىندالىپ جاتىر، - دەدى ول ب ا ق وكىلدەرىنىڭ ساۋالىنا وراي.

سونداي-اق ول تىلشىلەردىڭ: «اتالعان كومپانياعا قاتىستى قىلمىستىق ءىس قايتا تەرگەلە مە؟» دەگەن ساۋالىنا «ءيا» دەپ جاۋاپ بەردى.

ەسكە سالا كەتسەك، 2019 -جىلدىڭ 27-جەلتوقسانىندا الماتىدان استانا قالاسىنا ۇشىپ شىققان Bek Air كومپانياسىنىڭ ۇشاعى راداردان جوعالىپ كەتتى.

كەيىن 95 جولاۋشىسى جانە 5 ەكيپاج مۇشەسى بار ۇشاقتىڭ اپاتقا ۇشىراعانى ءمالىم بولدى.

ۇشاق جەرگە قۇلاعان سوڭ سىرعاناپ بارىپ اۋەجاي اۋماعىنا جاقىن تۇستاعى اۋىل شەتىندەگى ەكى قاباتتى ۇيگە سوعىلعان. سالدارىنان 12 ادام قازا تاپتى. وسىدان كەيىن Bek Air اۋە كومپانياسىنا تيەسىلى توعىز Fokker-100 ۇشاعىنىڭ قىزمەتى توقتاتىلدى.