ەڭبەك نارىعىندا قاي ماماندىقتارعا سۇرانىس جوعارى

استانا. KAZINFORM - قازىر ەلىمىزدىڭ ەڭبەك نارىعىندا قاي ماماندىقتارعا سۇرانىس جوعارى؟ بۇل سۇراققا ق ر ەڭبەك جانە حالىقتى الەۋمەتتىك قورعاۋ مينيسترىلىگى جاۋاپ بەردى.

«قازىرگى كەزدە Enbek.kz پلاتفورماسىندا (پورتال) 55 مىڭعا جۋىق بوس جۇمىس ورنى ورنالاستىرىلعان. ونىڭ ىشىندە ەڭ ۇلكەن سۇرانىسقا يە ءبىلىم بەرۋ سالاسىندا - 8,9 مىڭ ادامدى، بىلىكتىلىكتى تالاپ ەتپەيتىن سالالاردا - 8,4 مىڭ ادامدى، ءوندىرىس سالاسىندا - 6,8 مىڭ ادامدى، مەديتسينا سالاسىندا - 4,7 مىڭ ادامدى قۇرادى. سونداي-اق جۇمىس كۇشىنە سۇرانىس سولتۇستىك وڭىرلەردە 9,1 مىڭ ادامدى، ورتالىق جانە شىعىس وڭىرلەردە - 14,8 مىڭ ادامدى، وڭتۇستىك وڭىرلەردە - 8,1 مىڭ ادامدى، باتىس وڭىرلەردە - 7,8 مىڭ ادامدى جانە مەگوپوليستىك قالالاردا 13,5 مىڭ ادامدى قۇراپ وتىر»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

اتالعان پورتالدا 245 مىڭ تۇيىندەمە ورنالاستىرىلعان. سونىڭ اراسىندا cولتۇستىك وڭىرلەردەن 20,6 مىڭ ادامنان، ورتالىق جانە شىعىس وڭىرلەردە - 38,7 مىڭ ادامنان، وڭتۇستىك وڭىرلەردە - 72 مىڭ ادامنان، باتىس وڭىرلەردە - 61,3 مىڭ ادامنان، ال مەگوپوليستىك قالالاردا 53 مىڭ ادامنان كەلىپ ءتۇستى.

«وسى ورايدا بوس جۇمىس ورىندارى مەن تۇيىندەمەلەردىڭ سانىنا قاتىستى تەڭگەرىمسىزدىك بار ەكەنى بايقالىپ وتىر. سوندىقتان اتالعان پورتال جۇمىس بەرۋشىلەر مەن جۇمىس ىزدەپ جۇرگەندەر اراسىنداعى اقپاراتتىق الاڭ ەكەنىن ەسكەرە وتىرىپ، پورتال ارقىلى بەلسەندى تۇردە ءوزارا ءىس- قيمىل جاساپ، تاپشىلىق نەمەسە جۇمىسسىزدىق ماسەلەسىن شەشۋگە تولىق مۇمكىندىك بار»، - دەلىنگەن ەڭبەك مينيسترلىگى اقپاراتىندا.

ايتا كەتەيىك، بۇعان دەيىن استانادا قانداي ماماندىقتى تەگىن مەڭگەرۋگە بولاتىنىن جازعان ەدىك.