ەڭبەك مينيسترلىگى اۋىلدا جۇمىسپەن قامتۋدىڭ جاڭا فورمالارىن ەنگىزۋى مۇمكىن

استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا اۋىل شارۋاشىلىعىندا جۇمىسپەن قامتۋدىڭ جاڭا ەرەجەلەرى قابىلداناتىنىن ايتتى.

ءمينيستردىڭ ايتۋىنشا، اۋىل شارۋاشىلىعىندا جۇمىسپەن قامتۋدى زاڭدىق تۇرعىدان اشىق راسىمدەۋ - اۋىلدىق اۋماقتاردىڭ تۇراقتى دامۋىن قامتاماسىز ەتۋدىڭ نەگىزگى مىندەتتەرىنىڭ ءبىرى سانالادى.

«ۇلتتىق ستاتيستيكا بيۋروسىنىڭ دەرەكتەرى بويىنشا 2023 -جىلى ەلىمىزدىڭ اۋىل شارۋاشىلىعىنداعى جۇمىسپەن قامتىلعان 1,1 ميلليون جۇمىسكەردىڭ جارتىسىنان كوبى - ءوزىن-ءوزى جۇمىسپەن قامتىعاندار. ولاردىڭ جالاقىسى رەسپۋبليكالىق دەڭگەيدەگى ورتاشا ەڭبەكاقىدان ەكى ەسە دەرلىك تومەن. بۇل فورمالدى ەمەس جۇمىسپەن قامتۋدىڭ جوعارى دەڭگەيىن جانە اۋىل جۇمىسكەرلەرىنىڭ الەۋمەتتىك قورعالۋىنىڭ تومەن دەڭگەيىن كورسەتەدى»، - دەدى س. جاقىپوۆا ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.

مينيسترلىك عىلىمي جانە ساراپتامالىق قاۋىمداستىقتارمەن جانە اۋىل شارۋاشىلىعى مينيسترلىگىمەن بىرلەسىپ، سوڭعى 24 جىلداعى اۋا رايى تۋرالى كوپتەگەن مالىمەتتەردى تالداعان. بۇل دەرەكتەر ءتۇرلى اۋماقتارداعى كليمات پەن توپىراقتىڭ بارلىق ەرەكشەلىكتەرىن ەسكەرەتىن ارنايى ماتەماتيكالىق مودەلدەر جاساۋعا مۇمكىندىك بەردى.

«وسى مودەلدەردىڭ كومەگىمەن ءبىز ءاربىر جەرگە قاتىستى ناقتى ۇسىنىستار جاسادىق. نەگىزگى ەرەكشەلىگى - بارلىق مەحانيكالاندىرىلعان جۇمىستى نورمالاۋ، بۇل اۋىلداعى ناقتى جۇمىسپەن قامتۋدى باقىلاۋعا مۇمكىندىك بەرەدى. مال باسىنا قىزمەت كورسەتۋ نورمالارى قالىپتاستىرىلدى جانە جۇمىسشىلاردىڭ نورماتيۆتىك سانىنىڭ ەسەبى جۇرگىزىلدى. اۋىلدا جۇمىسپەن قامتۋدىڭ جاڭا فورمالارىن (ۆاحتالىق، ماۋسىمدىق، ءموبيلدى كاسىپكەرلىك) ەنگىزۋ ماسەلەسى قاراستىرىلۋدا»، - دەدى ەڭبەك ءمينيسترى.

وسى جۇيەنى ەنگىزۋ ناتيجەلەرى اۋىل شارۋاشىلىعىندا رەسۋرستاردى پايدالانۋ تيىمدىلىگىن ارتتىرۋعا، ونىڭ ەلدىڭ ج ءى ءو قۇرىلىمىنداعى ۇلەسىن ارتتىرۋعا، اۋىل شارۋاشىلىعىندا جۇمىسپەن قامتۋدى راسىمدەۋگە جانە ۇلعايتۋعا، اۋىلدىق جەرلەردەن قالالارعا كوشى-قون اعىندارىن تومەندەتۋگە ىقپال ەتەدى، دەپ ءتۇسىندىردى مينيستر.

اۆتور
ايجان سەرىكجان قىزى