ەڭبەك ءمينيسترى تابىسى جوعارى سالالاردى اتادى

 بىلتىر جۇمىسقا ورنالاسقان كوللەدج تۇلەكتەرىنىڭ 57 پايىزى ونىمدىلىگى تومەن سالالاردا جۇمىس ىستەيدى. مۇنى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى، دەپ حابارلايدى Kazinform اگەنتتىگى. 

«جۇمىسپەن قامتىلعان حالىقتىڭ جارتىسىنا جۋىعىندا، ياعني 9,1 ميلليون ادامنىڭ 4,4 ميلليونىندا كاسىپتىك-تەحنيكالىق ءبىلىمى بار. سوندىقتان تەحنيكالىق جانە كاسىپتىك ءبىلىم جۇيەسىنىڭ ساپاسى بۇكىل ەكونوميكاداعى ونىمدىلىككە جانە حالىقتىڭ تابىسىنا ايتارلىقتاي اسەر ەتەدى. بۇگىنگى تاڭدا قازاقستان ونىمدىلىك دامىعان ەلدەردەن ورتا ەسەپپەن 4 ەسە، نورۆەگيادان - 7 ەسە، گەرمانيا، فرانسيا، فينليانديا، ۇلى بريتانيا، يتاليادان 5 ەسە ارتتا قالىپ وتىر»، - دەپ دەرەكتەر كەلتىردى مينيستر.

سۆەتلانا جاقىپوۆانىڭ سوزىنە ساي، كاسىپتىك-تەحنيكالىق ءبىلىمى بار ازاماتتار نەگىزىنەن ساۋدا، ونەركاسىپ جانە اۋىل شارۋاشىلىعى سالالارىندا جۇمىس ىستەيدى.

«ءبىزدىڭ اقپاراتتىق جۇيەلەرىمىزدىڭ مالىمەتتەرى بويىنشا، ونەركاسىپ، دەنساۋلىق ساقتاۋ، كولىك جانە قۇرىلىس سالاسىندا جۇمىس ىستەيتىندەر ەڭ جوعارى تابىس پەن ونىمدىلىككە يە. بۇل رەتتە 2022 -جىلعى جۇمىسقا ورنالاستىرىلعان تۇلەكتەردىڭ W ى ونىمدىلىگى تومەن سالالاردا جۇمىس ىستەيدى، بۇل تيىسىنشە ولاردىڭ تابىسىنا اسەر ەتەدى»، - دەدى سۆەتلانا جاقىپوۆا.

مينيستر سونىمەن بىرگە شاحتەرلەردىڭ زەينەت جاسىن تومەندەتۋ ماسەلەسى قاشان شەشىلەتىنىن ايتتى.