بۋددا كۇنى: موڭعوليادا ءدىني راسىمدەر مەن مەرەكەلىك شارالار ءوتىپ جاتىر

استانا. KAZINFORM - موڭعوليادا اي كۇنتىزبەسى بويىنشا جازدىڭ العاشقى ايىنىڭ 15-كۇنىندە بۋددا مەرەكەسى تويلانادى، دەپ حابارلايدى مونتسامە.

2025 -جىلى بۇل كۇن 11 ماۋسىمعا سايكەس كەلىپ وتىر.

بۇل ءدىني مەرەكە جىل سايىن وزگەرىپ وتىرادى، سەبەبى ول اي كۇنتىزبەسى بويىنشا جازدىڭ ءبىرىنشى ايىنىڭ ون بەسىنشى كۇنىنە سايكەس كەلەدى. بۋددا كۇنى - بۋددانىڭ ومىرىندەگى ءۇش ماڭىزدى وقيعاعا ارنالعان: ونىڭ دۇنيەگە كەلۋى، نيرۆاناعا (اعارتۋشىلىققا) جەتۋى جانە پارينيرۆاناعا (ياعني، بۇل دۇنيەدەن كەتۋى) ەنۋى.

اتالعان كۇن بۋدديستىك ازيا ەلدەرىندە 2000 -جىلدان بەرى تويلانىپ كەلەدى. 1999 -جىلى بىرىككەن ۇلتتار ۇيىمى باس اسسامبلەياسى بۋددا كۇنىن حالىقارالىق دەڭگەيدە اتاپ ءوتۋ تۋرالى شەشىم قابىلدادى. ال موڭعوليا پارلامەنتى 2019 -جىلى مەملەكەتتىك مەرەكەلەر مەن سالتاناتتى كۇندەر تۋرالى زاڭعا وزگەرىستەر ەنگىزىپ، بۋددا كۇنىن رەسمي مەملەكەتتىك مەرەكە جانە دەمالىس كۇنى دەپ بەكىتتى.

بۇل كۇنى ەل استاناسىندا باستى بۋدديستىك مەرەكەگە ارنالعان سالتاناتتى شەرۋ وتەدى. سونداي-اق ەلدەگى بارلىق موناستىردا، سونىڭ ىشىندە موڭعول بۋدديزمىنىڭ ورتالىعى سانالاتىن گاندانتەگچينلەن موناستىرىندا موناحتار ارنايى دۇعالار، بۋدديستىك راسىمدەر مەن سالت-جورالاردى ورىندايدى جانە ءدىني ۋاعىزدارىمەن بولىسەدى.