بۇدان بىلاي قاي وڭىردە قاي سپورت ءتۇرى دامىتىلاتىنىن مينيسترلىك شەشەدى
سپورت جانە دەنە شىنىقتىرۋ كوميتەتى ءتوراعاسىنىڭ ورىنباسارى ايگۇل بەكتەنوۆا ورتالىق كوممۋنيكاتسيالار قىزمەتىندە وتكەن بريفينگىدە وليمپيادالىق سپورت تۇرلەرىن دامىتۋدىڭ ءتارتىبى وزگەرەتىنىن ايتتى، دەپ حابارلايدى Kazinform.
«نەگە ەلىمىزدە مەدال ەڭ كوپ ساراپقا سالىناتىن سپورت تۇرلەرىن دامىتپاسقا؟ توڭىرەگىندە ۇنەمى داۋ-داماي بولىپ جاتاتىنىنا قاراماستان، قارجىلاندىرىلاتىن سپورت تۇرلەرىنىڭ تىزىمىندە اۋىر اتلەتيكا باسىمدىققا يە؟»، - دەپ سۇرادى جۋرناليست.
ايگۇل بەكتەنوۆا وسى باعىتتا جۇمىستار ەندى قولعا الىنىپ جاتقانىن ايتادى.
«قازىر مەدال كوپ ساراپقا سالىناتىن جانە تىرەك سپورت تۇرلەرىنىڭ ماسەلەسى پىسىقتالىپ جاتىر. بۇگىندە زاڭ جوباسى ازىرلەندى، بۇعان دەيىن ءار ءوڭىر قاي سپورت ءتۇرىن دامىتاتىنىن ءوزى شەشەتىن. ءار ءوڭىر 55 تەن 100 گە دەيىن سپورت ءتۇرىن دامىتاتىن. ءتىپتى ولاردىڭ ىشىندە وليمپيادالىق، پاراليمپيادالىق، سۋردوليمپيادالىق، ازيالىق ويىنداردىڭ باعدارلاماسىنا كىرمەيتىن تۇرلەر دە بولعان. سايكەسىنشە، حالىقارالىق يميدجگە دە اسەرى بولمايدى. سوندىقتان بۇل قۇزىرەتتى وزىمىزگە الىپ وتىرمىز. ءار وڭىردە قانداي سپورت تۇرلەرى دامىتىلاتىنىن كليمات جاعدايىنا قاراي ايقىندايمىز.
قازىر بىزدە قايشى تەندەنتسيالار بار. قىسقى سپورتقا بەيىم سولتۇستىك وڭىرلەردە حالىقارالىق ارەناداعى جەتىستىكتەر جوق بولسا، وڭتۇستىك وڭىرلەردە فريستايل-اكروباتيكا سياقتى سپورت تۇرلەرىنەن الەم كۋبوگىنىڭ جۇلدەگەر، وليمپيادا ويىندارىنىڭ بەسىنشى ورىنى بار. وسىنداي قايشى تەندەنتسيالار بولماۋى ءۇشىن سپورت تۇرلەرىن دامىتۋدى تارتىپكە كەلتىرگىمىز كەلەدى»، - دەدى ايگۇل بەكتەنوۆا.