بۇدان بىلاي عالىمدارعا بيۋروكراتيالىق كەدەرگى بولمايدى - اسحات ايماعامبەتوۆ

استانا. KAZINFORM - پارلامەنت ءماجىلىسىنىڭ دەپۋتاتى اسحات ايماعامبەتوۆ Facebook الەۋمەتتىك پاراقشاسىندا قازاقستان عالىمدارى كوپتەن بەرى كۇتكەن وڭتايلى جاڭالىقتى ايتتى.

ول جاقىندا زاڭ شىعارۋ ورگانىنداعى ءوزى ءتوراعالىق ەتەتىن الەۋمەتتىك- مادەني دامۋ كوميتەتىنىڭ مەملەكەتتىك ساتىپ الۋ تۋرالى زاڭ جوباسىنا بەرگەن تۇزەتۋدى جۇمىس توبى قابىلداعانىن، ەندى عىلىمي زەرتتەۋلەر جاساۋ ءۇشىن قاجەتتى تاۋارلاردى ساتىپ الۋ ءۇشىن ايلاپ، ءتىپتى جىلدان سوزىلاتىن بيۋروكراتيالىق كەدەرگىنىڭ الىنىپ تاستالاتىنىن اتاپ ءوتتى.

ونىڭ ايتۋىنشا، مىسالى، رەاكتيۆتەر مەن جۇمسالاتىن ماتەريالداردى ساتىپ الۋ پروتسەسى ايتارلىقتاي جەڭىلدەتىلەدى. بۇل ساتىپ الۋ راسىمدەرىنە ەندى بيۋروكراتيالىق كەدەرگى مۇلدە بولمايدى.

قازىر عىلىمدا مەملەكەتتىك ساتىپ الۋ ءىسى وتە بيۋروكراتيالانعان. زەرتتەۋلەر ءۇشىن قاجەتتى ماتەريالداردى الۋ ءۇشىن ءوتىنىش كافەدرا مەڭگەرۋشىسىنەن باستاپ دەكان، پرورەكتور جانە مەملەكەتتىك ساتىپ الۋشىعا دەيىن كوپتەگەن ينستانتسيالاردان ءوتۋى كەرەك. ودان كەيىن تەندەر جاريالانىپ، ول ايلارعا، ءتىپتى جىلدارعا سوزىلادى. ال عىلىم ءۇشىن ءاربىر كۇن ماڭىزدى بولعاندىقتان، مۇنداي قيىندىقتار زەرتتەۋدى تولىقتاي ماعىناسىز ەتەدى.

ەندى جاڭا تۇزەتۋلەر عالىمدارعا بيۋروكراتيالىق كەدەرگى جاسامايدى.

بۇدان بىلاي ساتىپ الۋلار مەملەكەتتىك ساتىپ الۋ زاڭىمەن ەمەس، ۋاكىلەتتى مينيسترلىكتىڭ بەكىتكەن ارنايى ەرەجەسىمەن رەتتەلەدى. ءبىراق، بۇل ماسەلەنى شەشكەندە، ءبىز سىبايلاس جەمقورلىقتى دا الدىن الۋمىز كەرەك. سوندىقتان اشىقتىق پەن سيفرلاندىرۋ ارقىلى بۇل تالاپ ورىندالاتىن بولادى، - دەدى دەپۋتات.

ونىڭ پىكىرىنشە، بۇل وزگەرىستەر، ياعني بيۋروكراتيالىق كەدەرگىنى الىپ عالىمدارعا زەرتتەۋلەردى جۇرگىزۋ ءۇشىن جاڭا مۇمكىندىكتەر بەرەدى. عالىمدار ەندى رەسۋرستاردى كۇتۋگە كوپ ۋاقىت جوعالتپايدى.

ەندى اكىمشىلىك كەدەرگىلەر ازايعان كەزدە، عالىمدار تەك عانا يننوۆاتسيالار مەن عىلىمي ىزدەنىستەرگە نازار اۋداراتىن بولادى.

وسى ماسەلە بويىنشا پرەزيدەنت قاسىم- جومارت توقايەۆ ۇكىمەتكە بىرنەشە رەت تاپسىرما بەرگەن. سونىمەن قاتار امانات پارتياسى دا ءوز سايلاۋالدى ۋادەلەرىندە وسى ماسەلەنى شەشۋ تۋرالى ايتقان بولاتىن، - دەدى ول.

ءماجىلىس دەپۋتاتى سارسەنبىدە پارلامەنتتىڭ جالپى وتىرىسىندا زاڭ جوباسى ەكىنشى وقىلىمدا قارالاتىنىن ايتتى.

اۆتور

باقىتگۇل اباي قىزى