بازالىق مولشەرلەمە، مۇناي باعاسى جانە ينفلياتسيامەن نە بولادى

استانا. KAZINFORM — ۇلتتىق بانك ساراپشىلار قاۋىمداستىعى اراسىندا جۇرگىزىلگەن كەزەكتى ماكروەكونوميكالىق ساۋالنامانىڭ ناتيجەسىن جاريالادى.

Brent ماركالى مۇناي باعاسى، قازاقستان ەكونوميكاسىنىڭ ءوسىمى، ينفلياتسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى جانە يمپورتى، سونداي-اق تەڭگە باعامى - ساۋالنامانىڭ نەگىزگى پارامەترى بولدى.

مۇناي باعاسى جانە ەكونوميكانىڭ ءوسىمى

مۇناي باعاسى بويىنشا ستسەناريي شارتتارى 2025-جىلعا ازداپ تومەندەگەنىمەن، 2026 جانە 2027-جىلدارعا - ءوستى. اناليتيكتەر بارلىق بولجامدى كەزەڭدە مۇناي باعاسى باررەل ءۇشىن 68,5-69 ا ق ش دوللارى دەڭگەيىندە بولادى دەپ كۇتەدى.

قازاقستان ەكونوميكاسىنىڭ وسىمىنە قاتىستى بولجامدار بارلىق بولجامدى كەزەڭدە ءبىرشاما جاقساردى. وسىلايشا، 2025 -جىلعا ارنالعان ءجىو ءوسىمى بويىنشا بولجام 5 پايىزدان 5,1 پايىزعا، 2026-جىلعا - 4,5 پايىزدان 4,6 پايىزعا، ال 2027-جىلعا - 4,3 پايىزدان 4,5 پايىزعا دەيىن جوعارىلادى.

ينفلياتسيا جانە بازالىق مولشەرلەمە

ينفلياتسيا بويىنشا اناليتيكتەردىڭ بولجامى بولجامدىق كەزەڭدە ءارتۇرلى باعىتتا وزگەردى: 2025-جىلعا - مەديانا 10,7 پايىزدان 11 پايىزعا دەيىن ءوستى، 2026-جىلعا - 9,4 پايىزدان 9 پايىزعا دەيىن تومەندەدى، 2027-جىلعا - 6,8 پايىزدان 7 پايىزعا دەيىن ءوستى.

رەسپوندەنتتەر بازالىق مولشەرلەمە 2025-جىلدىڭ سوڭىنا دەيىن قازىرگى دەڭگەيدە ساقتالادى دەپ كۇتەدى - مەديانا 16,3 پايىزدان 16,5 پايىزعا دەيىن ءوستى. 2026-جىلعا بولجامدار 14,5 پايىزدان 14 پايىزعا دەيىن، 2027-جىلعا - 12 پايىزدان 11,8 پايىزعا دەيىن تومەندەدى.

ساۋالناماعا قازاقستاندا ماكروەكونوميكالىق كورسەتكىشتەردى تالداپ، بولجاۋمەن اينالىساتىن 16 ۇيىم قاتىستى. رەسپوندەنتتەردىڭ قاتارىنا نارىقتىڭ كاسىبي قاتىسۋشىلارى، زەرتتەۋ ينستيتۋتتارى، حالىقارالىق ۇيىمدار مەن رەيتينگتىك اگەنتتىكتەر كىرەدى. ماكروەكونوميكالىق ساۋالناماعا قاتىسۋشىلار قۇرامى Alatau City Bank Analytics ساراپشىلارىمەن تولىقتى.

اتاپ وتەتىن جايت، ماكروەكونوميكالىق ساۋالنامادا ۇلتتىق بانكتىڭ بولجامدارى كورسەتىلمەيدى. ول - قازاقستاندىق جانە الەمدىك نارىقتاعى جاعدايدىڭ دامۋىنا قاتىستى كاسىبي نارىق قاتىسۋشىلارىنىڭ تاۋەلسىز پىكىرى، باعالاۋلارى مەن كۇتۋلەرىنىڭ جيىنتىعى عانا.