ناتيجەسىندە ەكى تۇقىمىشىلىك تيپ پەن قوشقارلاردىڭ ەكى زاۋىتتىق جەلىسى مەملەكەتتىك دەڭگەيدە تانىلىپ، پاتەنت الدى، دەپ حابارلايدى اۋىل شارۋاشىلىعى مينيسترلىگى.
مينيسترلىك بۇيرىعىنا سايكەس، ا و ك-تەگى مەملەكەتتىك ينسپەكتسيا كوميتەتىنىڭ مەملەكەتتىك كوميسسياسى «بايسارى» تۇقىمىنىڭ سەلەكتسيالىق جەتىستىكتەرىن باعالادى. جۇمىستاردى عىلىمي جانە ۇيىمداستىرۋشىلىق تۇرعىدان ەتتى-مايلى باعىتتاعى قوي شارۋاشىلىعى رەسپۋبليكالىق پالاتاسى سۇيەمەلدەدى.
تۇركىستان وبلىسىنىڭ بايدىبەك، سايرام، سارىاعاش اۋداندارى مەن ارىس قالاسى اۋماعىندا تۇركىستان تۇقىمىشىلىك ءتيپى باعالاندى. ءبىرقاتار شارۋا قوجالىعى مەن كاسىپورىندا بارلىعى 7,3 مىڭعا جۋىق جوعارى ءونىمدى قوي تەكسەرىلدى.
- اپروباتسيا تىكەلەي اسىل تۇقىمدى شارۋاشىلىقتاردا جۇرگىزىلىپ، مال باسى مەن نەگىزگى ونىمدىلىك كورسەتكىشتەرى باعالاندى. تۇركىستان وبلىسىندا تۇركىستان تۇقىمىشىلىك ءتيپىنىڭ 7,3 مىڭعا جۋىق جوعارى ءونىمدى مال باسى زەرتتەلدى، -دەپ اتاپ ءوتتى مينيسترلىكتە.
سونىمەن قاتار № 00452 «ميلليون» جانە № 5042 «دەپۋتات» قوشقارلارىنىڭ ەكى زاۋىتتىق جەلىسى باعالاندى. «ميلليون» جەلىسىنىڭ نەگىزىن قالاعان قوشقاردىڭ ءتىرى سالماعى 231 كەلىگە جەتكەن. بۇل كورسەتكىش قازاقستاننىڭ رەكوردتار كىتابىنا ەنگىزىلگەن.
جامبىل جانە الماتى وبلىستارىندا جەتىسۋ تۇقىمىشىلىك تيپىنە جاتاتىن 3,5 مىڭنان استام قوي اپروباتسيادان ءوتتى. جامبىل وبلىسىندا جۇمىستار قورداي، شۋ، مەركى جانە ت. رىسقۇلوۆ اۋداندارىندا، ال الماتى وبلىسىندا قاراساي اۋدانى مەن قونايەۆ قالاسىنداعى شارۋاشىلىقتاردا جۇرگىزىلدى.
«بايسارى» قويى ەتتى-مايلى باعىتتاعى تۇقىمعا جاتادى. ەرەسەك اسىل تۇقىمدى قوشقارلاردىڭ ءتىرى سالماعى 140-180 كەلى بولسا، جەكەلەگەن مالدىڭ سالماعى 200 كەلىدەن اسادى. سويىس شىعىمى % 53-56 دى قۇرايدى.
مەملەكەتتىك سىناقتار مەن اپروباتسيا ناتيجەسىندە ءتورت سەلەكتسيالىق جەتىستىك رەسمي تۇردە تانىلىپ، پاتەنت الدى. ولار - № 1292 جەتىسۋ تۇقىمىشىلىك ءتيپى، № 1293 تۇركىستان تۇقىمىشىلىك ءتيپى، № 1294 «ميلليون» زاۋىتتىق جەلىسى جانە № 1295 «دەپۋتات» زاۋىتتىق جەلىسى.
الىنعان ناتيجەلەر الداعى ۋاقىتتا «بايسارى» قوي تۇقىمىنىڭ ونىمدىلىگى مەن سەلەكتسيالىق قاسيەتتەرىن جەتىلدىرۋگە باعىتتالعان اسىل تۇقىمدىق جۇمىستاردا پايدالانىلماق.
ايتا كەتەيىك، عالىمدار اسىل تۇقىمدى بۇقالاردىڭ ءوسىمتالدىعىن ارتتىرۋعا ارنالعان بيوقوسپاعا پاتەنت الدى.