باۋىرجان مومىش ۇلىنىڭ 115 جىلدىعىنا ارنالعان كىتاپ تانىستىرىلدى
استانا. KAZINFORM - وتان قورعاۋشىلار كۇنى مەن ۇلى وتان سوعىسىنداعى جەڭىستىڭ 80 جىلدىعى قارساڭىندا اتى اڭىزعا اينالعان قولباسشى، ۇلت باتىرى، جازۋشى باۋىرجان مومىش ۇلىنىڭ 115 جىلدىعىنا ارنالعان ايرىقشا كىتاپ جارىق كوردى، دەپ حابارلايدى Kazinform اگەنتتىگى.
جوبا KAZ Minerals توبىنىڭ قولداۋىمەن جۇزەگە اسىرىلدى.
كىتاپ قازاق جانە ورىس تىلىندە جازىلعان. مۇندا باۋىرجان مومىش ۇلىنىڭ ومىرىندەگى بۇگىنگە دەيىن بەيمالىم بولىپ كەلگەن جايتتار - كولباستاۋداعى بالالىق شاق، قان مايدانداعى ەرلىك جولى، سوعىستان كەيىنگى قوعامدىق- ادەبي قىزمەتى ءسوز بولادى. كوركەم بەزەندىرىلگەن باسىلىمدا مۇراعاتتاعى قۇجاتتار، تاريحي قۇندى سۋرەتتەر مەن مومىش ۇلىنىڭ ءتول تۋىندىلارىنان ۇزىندىلەر جانە زامانداستارىنىڭ ەستەلىكتەرى كەلتىرىلگەن.
كىتاپتى دايىنداۋ جۇمىسى ۇلت باتىرى جايلى ەستەلىكتى حاتقا ءتۇسىرىپ جاس ۇرپاققا دارىپتەۋ ماقساتىن ۇستانعان «Central Asia Production» باسپا ءۇيىنىڭ رەداكتورلارى مەن ديزاينەرلەرىن، تاريحشىلار مەن زەرتتەۋشىلەردى جانە مەتسەناتتاردى بىرىكتىردى.
باسىلىمنىڭ جارىق كورۋى KAZ Minerals توبىنىڭ تاريحي تانىم مەن پاتريوتتىقتى دامىتۋعا باعىتتالعان مادەني- اعارتۋ باستامالارىنىڭ ماڭىزدى بولشەگىنە اينالدى.
- باۋىرجان مومىش ۇلى تۋرالى ەستەلىك - تاريحىمىزدىڭ ءبىر بولشەگى عانا ەمەس، جاستارعا ونەگە بولاتىن قۇندى دەرەككوز بولىپ سانالادى. بۇل ۇلى تۇلعانىڭ ءومىربايانى عانا ەمەس، ۇرپاقتار اراسىنداعى رۋحاني بايلانىس، نامىس، ەرلىك پەن وتانعا قىزمەت ەتۋدىڭ ماڭىزدىلىعى تۋرالى تۋىندى، - دەپ مالىمدەدى «KAZ Minerals Management» ج ش س باسقارما ءتوراعاسى ەلدار مامەدوۆ.
جارقىن سۋرەتتەمە، سيرەك كەزدەسەتىن ماتەريالدار مەن تاريحي تەرەڭ مازمۇنى بۇل كىتاپتى ۇلتتىق تانىمدى نىعايتۋ تۇرعىسىندا ماڭىزدى ەتە تۇسپەك.
وسىعان دەيىن باۋىرجان مومىش ۇلىنىڭ الىپ پورترەتى رەكوردتار كىتابىنا ەنگەنى تۋرالى جازدىق.
ايدار وسپاناليەۆ