بايدەننىڭ پرەزيدەنت سايلاۋىنان باس تارتۋىنا باسقالار نە دەدى؟
استانا. KAZINFORM- دجو بايدەننىڭ پرەزيدەنت سايلاۋىنان باس تارتۋىنا ساياساتكەرلەر مەن ساراپشىلار ءتۇرلى پىكىر ءبىلدىرىپ جاتىر.
دەموكراتتاردىڭ باستى ءۇمىتى بولىپ كەلگەن بايدەننىڭ ورنىنا ەندى كىم ۇمىتكەر بولادى؟ ۆيتسە- پرەزيدەنت كامالا حارريستىڭ مۇمكىندىگى قانداي؟
دجو بايدەننىڭ مالىمدەمەسىنەن كەيىن 8 مينۋت وتكەن سوڭ باستى قارسىلاسى بىردەن ءتىل قاتتى. رەسپۋبليكالىق پارتيانىڭ ۇكىلەگەن ءۇمىتى دونالد ترامپ بايدەندى «ا ق ش تاريحىنداعى ەڭ ناشار پرەزيدەنت» دەپ اتادى جانە كامالا حارريستى قالپاقپەن ۇرىپ الامىن دەپ جار سالدى. «الاياق دجو بايدەن پرەزيدەنت سايلاۋىنا قاتىسۋعا جارامسىز بولىپ شىقتى، ول بۇرىننان جارامسىز ەدى، ول بۇل ورىنعا ەشقاشان جاراماعان! ول وتىرىك، جالعان اقپارات ارقىلى عانا پرەزيدەنت اتاندى»،- دەدى دونالد ترامپ.
شەتەلدىك ارىپتەستەردەن گەرمانيا كانسلەرى العاشقىلاردىڭ ءبىرى بولىپ ءۇن قاتتى. ولاف شولتس «بايدەن ءوز ەلى، ەۋروپا جانە بۇكىل الەم ءۇشىن كوپ ءىس تىندىردى» دەپ باعالادى. «بايدەننىڭ ارقاسىندا ناتو كۇشەيە ءتۇستى. ال ا ق ش ءبىزدىڭ جاقسى جانە سەنىمدى سەرىكتەسىمىزگە اينالدى. ونىڭ پرەزيدەنت دوداسىنان شىعامىن دەگەن شەشىمى قۇرمەتكە لايىق».
ا ق ش-تىڭ جاقىن وداقتاسى جاپونيا بيلىگى پىكىر بىلدىرۋدە سالقىن قاندىلىق تانىتتى.
فۋميو كيسيدا، جاپونيا پرەمەر-ءمينيسترى:
«بۇل ا ق ش- تىڭ ىشكى ءىسى. سوندىقتان تىكەلەي مالىمدەمە جاساۋدان تارتىنامىن. دەسە دە پرەزيدەنت بايدەن وتە دۇرىس ساياسي شەشىم قابىلدادى دەپ باعالايمىن. جاپونيا مەن ا ق ش- تىڭ وداقتاستىعى - جاپون ديپلوماتياسى مەن قاۋىپسىزدىگى ءۇشىن اسا ماڭىزدى فاكتور، ءبىز ا ق ش- تاعى ساياسي جاعدايدى ءجىتى نازاردا ۇستايمىز».
دجو بايدەن جاي كەتپەي، ورنىنا ورىنباسارى كامالا حارريستى ۇسىنىپ كەتتى. حارريستىڭ ءوزى باعىن سىناپ كورۋگە كەت ءارى ەمەس ەكەنىن ءبىلدىردى. «دەموكراتيالىق پارتيا مەن ۇلتىمىزدى بىرىكتىرۋ، دونالد ترامپ پەن ونىڭ ەكسترەمالدى باعدارلاماسىنان باسىم ءتۇسۋ ءۇشىن مەن بارىمدى سالامىن. سايلاۋعا 107 كۇن عانا قالدى. ءبارىمىز بىرگە كۇرەسەمىز جانە جەڭىسكە بىرگە جەتەمىز».
59 جاستاعى كامالا حارريس مانساپ جولىندا تەز وسكەن ساياساتكەر. كاليفورنيا شتاتىنىڭ باس پروكۋرورىنان سەناتورلىققا وتكەن. سوڭعى سايلاۋدا باعى جانىپ، ۆيتسە-پرەزيدەنت اتاندى.
مينا بوۋز، ساياساتتانۋشى:
«بۇل بايدەن ءوز شەشىمى ەمەس، بۇل پارتيانىڭ شەشىمى. بۇل تۋرالى ول ءوز حاتىندا ايتتى. بايدەننىڭ جاسى، كۇش-قۋاتى، قابىلەت-قارىمىنا قاتىستى الاڭداۋشىلىق بىلدىرگەن اڭگىمەنىڭ ءجۇرىپ جاتقانىنان 1 جىلدان استى. دەموكراتتاردىڭ سيەزى 19-تامىزدا باستالادى. ياعني ولار ءۇشىن ۋاقىت وتە تىعىز. ماسەلە، ايەل ادامنىڭ پرەزيدەنت بولۋىندا ەمەس، ماسەلە، حارريستىڭ جەڭىسكە جەتە الۋىندا. ونىڭ رەيتينگى نەگىزى تومەندەۋ. ءبارىن ۋاقىت كورسەتەدى».
ساراپشىلار دەموكراتتاردىڭ الدىندا 2 تاڭداۋ تۇر: ۆيتسە-پرەزيدەنت حارريستىڭ ماڭىنا توپتاسادى نە جاڭا ۇمىتكەردى تاڭداۋ ءۇشىن اشىق تالقىلاۋ وتكىزەدى دەپ توپشىلايدى.
ەرنات مەلس ۇلى