بايدەننىڭ ۇلى رۋمىندىق وليگارحتان پارا الدى دەگەن كۇدىككە ءىلىندى
استانا. KAZINFORM - ارنايى پروكۋرور ۆەنس ا ق ش پرەزيدەنتىنىڭ ۇلى حانتەر بايدەندى رۋمىندىق وليگارحتان 3 ميلليون دوللار الدى دەپ ايىپتادى.
حانتەر بۇل اقشانى امەريكالىق ۆەدومستۆولارعا ىقپال ەتۋ ءۇشىن پايدالانۋعا ۋادە بەرگەن. بۇل تۋرالى ارنايى پروكۋراتۋرا مالىمدەدى، دەپ جازادى DW.
7-تامىز، سارسەنبى كۇنى امەريكا قۇراما شتاتتارىندا ارنايى پروكۋرور دەۆيد ۆايستىڭ كەڭسەسى پرەزيدەنت دجو بايدەننىڭ ۇلى حانتەر مەن ونىڭ ىسكەر سەرىكتەستەرىن امەريكالىق مەملەكەتتىك ۆەدومستۆولارعا ىقپال ەتۋ ۋادەسىمەن رۋمىندىق وليگارحتان 3 ميلليون دوللار الدى دەپ ايىپتادى. بۇل تۋرادى امەريكاندىق ABC News مەديا كومپانياسى حابارلاعان.
ارنايى پروكۋراتۋرانىڭ سوتقا بەرگەن ماتەريالدارىنا سايكەس، رۋمىن كاسىپكەرى گابريەل پوپوۆيچيۋ 2015 -جىلى حانتەر بايدەندى زاڭگەرلىك تاپسىرمالاردى ورىنداۋ ءۇشىن جالداعان. وسىدان كەيىن وليگارحقا ءوز ەلىندە جەمقورلىق جاسادى دەگەن ايىپ تاعىلدى.
سوت وتىرىستارىندا ا ق ش پرەزيدەنتى بايدەننىڭ ۇلى پوپوۆيچيۋدەن امەريكاندىق بيلىككە ىقپال ەتۋگە ۋادە بەرگەنى ءۇشىن اقشا العانىن راستايتىن دالەلدەر ۇسىنىلعان. ءوز كەزەگىندە رۋمىنيادا پوپوۆيچيۋعا تاعىلعان ايىپتار بويىنشا تەرگەۋ جۇرگىزىلەتىنى ايتىلدى.
حانتەر بايدەن بۇعان دەيىن 2016-2020 -جىلدار ارالىعىندا جالپى سوماسى 1,4 ميلليون دوللاردى قۇرايتىن سالىق تولەۋدەن جالتارعان ءۇش فاكتى بويىنشا ايىپتالعان بولاتىن. پرەزيدەنتتىڭ ۇلى كەيىننەن ايىپپۇلدارمەن بىرگە بۇل سومانى تولەدى.