بايدەننىڭ ءبىر بايانداماسى - 300 مىڭ دوللار

نيۋ-يورك. KAZINFORM - ا ق ش- تىڭ بۇرىنعى پرەزيدەنتى دجو بايدەن كەز كەلگەن ءىس-شارادا بايانداما جاساۋ ءۇشىن ۇيىمداستىرۋشىلاردان 300 مىڭ دوللار تالاپ ەتەدى.

 بۇل تۋرالى New York Post باسىلىمى حابارلادى، دەپ جازادى تاسس.

باسىلىمنىڭ مالىمەتىنشە، ەگەر ءىس-شارا باسقا قالادا وتسە، بايدەن جەكە ۇشاقپەن ۇشىپ بارۋى ءتيىس جانە ونىمەن بىرگە بەس كومەكشىسىنىڭ دە جول شىعىندارى تولىقتاي وتەلۋى كەرەك.

ايتا كەتەرلىگى، بايدەن سۇراپ وتىرعان سوما ا ق ش- تىڭ 44-پرەزيدەنتى باراك وبامانىڭ 2017 -جىلى قويعان 400 مىڭ دوللارلىق باعاسىنان 25 پايىزعا از.

سوعان قاراماستان، ەكس-پرەزيدەنتتىڭ سپيكەر رەتىندەگى تانىمالدىعى اسا جوعارى ەمەس. بايدەنمەن جۇمىس ىستەيتىن Creative Artists Agency (CAA) ونى ءتۇرلى ءىس-شارالارعا شاقىرۋشىلاردى تابۋ قيىنعا سوعىپ وتىرعانىن ايتقان.

بۇرىنعى پرەزيدەنت جاقىندا، ياعني پرەزيدەنتتىك قىزمەتىنەن كەتكەننەن كەيىن العاش رەت كوپشىلىك الدىندا ءسوز سويلەدى. ول يللينويس شتاتىنىڭ چيكاگو قالاسىندا مۇمكىندىگى شەكتەۋلى ادامدارعا زاڭ كومەگىن كورسەتەتىن ۇكىمەتتىك ەمەس ۇيىم وتكىزگەن كونفەرەنسيادا بايانداما جاسادى.

NYP تىلشىسىنە پىكىر بىلدىرگەن بۇرىنعى اق ءۇي قىزمەتكەرى بايدەننىڭ ءبىراز السىرەگەنىن اتاپ وتكەن.

- بۇل كورىنىستى كورۋ بىزگە اۋىر ءتيدى. مەن قادىر تۇتاتىن ادامنىڭ قارتايعانىن بايقادىم، - دەيدى ول.

2025 -جىلعى 20 -قاڭتاردا دجو بايدەن 82 جاسىندا پرەزيدەنتتىك وكىلەتتىگىن دونالد ترامپقا تاپسىرعان بولاتىن. ونىڭ پرەزيدەنتتىك مەرزىمى كەزىندە ءجيى سوزدەن جاڭىلۋى مەن ءارتۇرلى وعاش قىلىقتارى ساياسي قارسىلاستارىنىڭ سىنىنا ۇشىراعان.

ايتا كەتەيىك، ترامپ بايدەن جاريالاعان راقىمشىلىقتىڭ كۇشىن جويعان بولاتىن.

سونداي-اق ترامپ بۇرىنعى پرەزيدەنتتى قۇپيا اقپاراتقا قول جەتكىزۋ قۇقىعىنان ايىردى.

اۆتور

جاراسقان نۇرىبايەۆ