بايبەكتىڭ اكەسىنىڭ ەسىمى قوسپايەۆقا قاتىستى ىستە اتالدى

استانا. KAZINFORM - ەكس-اكىم باۋىرجان بايبەكتىڭ اكەسىنىڭ ەسىمى ەلدوس قوسپايەۆتىڭ ۇيىمداسقان قىلمىستىق توبىنا قاتىستى قىلمىستىق سحەمالاردا اتالدى، - دەپ حابارلايدى Massaget.kz ءتىلشىسى.

بۇل تۋرالى ءساۋىردىڭ اياعىندا سوتتالعان، ۇيىمداسقان قىلمىستىق توپ مۇشەلەرىنىڭ ءبىرى ايبەك قوسپايەۆقا قاتىستى سوت قۇجاتتارىندا كورسەتىلگەن.

اڭگىمە Esentai City تۇرعىن ءۇي كەشەنىندەگى پاتەرلەردى ساتۋ تۋرالى بولىپ وتىر. سوت ۇكىمىنە سايكەس بۇل پاتەرلەر نارىقتاعى باعادان تومەن باعادا ۇيىمداسقان قىلمىستىق توپ مۇشەلەرىنىڭ تۋىستارى مەن تانىستارىنا ساتىلعان. مۇنداي ساتىپ الۋشىلار قاتارىندا قىدىرعالي بايبەك تە بولعان.

تەرگەۋ مالىمەتتەرى بويىنشا قوسپايەۆتىڭ قىلمىستىق توبى 2019-جىلعى 8-ساۋىردەن 2020-جىلعى 23-جەلتوقسانعا دەيىن AV- Construction ج ش س مۇلكىن ۇرلاعان.

«وسىلايشا د. ابيجانوۆ، ت. تاناشيەۆ جانە ر. بابايەۆ ۇيىمداسقان توپ جەتەكشىسى ە. قوسپايەۆ جانە باسقالارىمەن كەلىسىپ، سەنىپ پايدالانۋعا بەرىلگەن جانە سالىنىپ جاتقان جىلجىمايتىن مۇلىك نىساندارىن الماتىنىڭ اكىمى بولعان ب. بايبەكتىڭ اكەسى ق. بايبەكتىڭ پايداسىنا وزىندىك قۇنىنان تومەن باعامەن ساتۋعا شەشىم قابىلداعان»، - دەپ جازىلعان ۇكىمدە.

بايبەكتىڭ اكەسىنە قاتىستى ەپيزودتار

وسىلايشا قىدىرعالي بايبەك Esentai City كەشەنىندەگى پاتەر مەن ەكى كوممەرتسيالىق نىساننىڭ يەسى بولعان.

سوت ۇكىمى بويىنشا 2019-جىلعى 8-ساۋىردە AV- Construction كەڭسەسىندە قوسپايەۆ ۇيىمداسقان توبىنىڭ مۇشەسى ر. بابايەۆقا ق. بايبەكتىڭ اتىنا قاپپاروۆ كوشەسىندەگى 14-پاتەردى ساتۋ تۋرالى تاپسىرما بەرگەن. پاتەر 43586000 تەڭگەگە ساتىلعان، تەرگەۋ دەرەگى بويىنشا بۇل - وزىندىك قۇنىنان ايتارلىقتاي تومەن باعا.

تولەم جاسالعاننان كەيىن بابايەۆ قوسپايەۆتىڭ نۇسقاۋىمەن ق. بايبەكپەن ارادا جالپى اۋدانى 114,7 شارشى مەتر بولاتىن پاتەردى ساتۋ كەلىسىم شارتىنا وتىرعان. تەرگەۋ بۇل ارەكەتتى ۇيىمداسقان توپ جاساعان، اسا ءىرى مولشەردەگى مۇلىكتى ۇرلاۋ رەتىندە باعالاعان.

Esentai City-دەگى كوممەرتسيالىق نىساندار دا ارزانعا ساتىلعان

2020-جىلعى 23-جەلتوقساندا قوسپايەۆ كومپانيا كەڭسەسىندە تاعى دا ق. بايبەككە قاپپاروۆ كوشەسىندەگى ەكى كوممەرتسيالىق نىساندى تومەن باعامەن ساتۋ تۋرالى تاپسىرما بەرگەن.

بابايەۆ، ابيجانوۆ جانە تاناشيەۆپەن كەلىسىپ، نىساندار مەن ولاردىڭ باعاسىن انىقتاعان. ناتيجەسىندە مىناداي كەلىسىمدەر جاسالعان:

121,6 شارشى مەترلىك نىسان - 50206027 تەڭگەگە؛

97,6 شارشى مەترلىك نىسان - 40464621 تەڭگەگە.

بۇل زاڭسىز ارەكەتتەردىڭ سالدارىنان AV- Construction ج ش س مەن ونىڭ زاڭدى يەلەرىنە 65946191 تەڭگە كولەمىندە زالال كەلتىرىلگەن.

سوت ۇكىمىنە سايكەس ۇيىمداسقان توپ 2018-جىلعى شىلدەدەن 2022-جىلعى ساۋىرگە دەيىن Esentai City كەشەنىندە AV- Construction-عا تيەسىلى پاتەرلەردى، كەڭسەلەر مەن جەر تەلىمدەرىن وزىندىك قۇنىنان تومەن باعادا وزدەرىنە، تۋىستارىنا ساتۋ نەمەسە مۇلدە تولەمەي بەرۋ ارقىلى 4628145093,13 تەڭگە كولەمىندە ۇرلىق جاساعان.

ايتا كەتەيىك، توپ مۇشەسى ايبەك قوسپايەۆ كىنالى دەپ تانىلىپ، 12 جىلعا باس بوستاندىعىنان ايىرىلدى. ۇكىم زاڭدى كۇشىنە ەنگەن جوق.