باياناۋىلداعى سابىندىكول جاعالاۋى زامانعا ساي اباتتاندىرىلادى

پاۆلودار. KAZINFORM - باياناۋىلداعى سابىندىكول ماڭايىن الداعى ۋاقىتتا زامانعا ساي اباتتاندىرۋ جوسپارلانىپ وتىر.

مۇندا پاۆلودار قالاسىنداعى ورتالىق جاعاجايداعىداي اعاشتان جاسالعان جولدار، كۇننەن قورعايتىن شاتىرلار، اعاش شەزلونگتار، دۋش پەن كيىم اۋىستىراتىن ورىنداردى ورنالاستىرۋ كوزدەلگەن.

تاۋلى ولكەگە اعىلىپ كەلىپ جاتقان تۋريستەردىڭ كوپتىگى ەسكەرىلە وتىرىپ، كولدىڭ نەگىزگى جاعاجايىنا شولۋ الاڭىن ورنالاستىرۋ كوزدەلگەن. كەلەشەكتە بۇل اۋماق جاسىباي دەمالىس ايماعى سياقتى زاماناۋي دەمالىس ورنىنا اينالۋى عاجاپ ەمەس.

«تاعى ءبىر جوبا - باياناۋىل اۋىلىنداعى سابىندىكول كولىنىڭ جاعاجاي ايماعىنا كىرە بەرىس جەردە شولۋ الاڭىن سالۋ. بۇل جەردە بولاشاقتا زامانعا ساي جاعاجاي پايدا بولادى. جوبالاۋشىلار پاۆلودارداعىداي جايلى دا ادەمى ينفراقۇرىلىمدار سالۋدى كوزدەپ وتىر. سونداي-اق باياناۋىلدا كوۆوركينگ پەن كونفەرەنسيالارعا ارنالعان ارنايى كابينەتتەر، مۋلتيمەديالىق مۇراجاي جانە ت. ب. ورنالاساتىن ۆيزيت-ورتالىقتىڭ قۇرىلىس جوباسى دا دايىن تۇر»، - دەپ حابارلادى وڭىرلىك اكىمدىكتىڭ باسپا ءسوز قىزمەتىنەن.

ەسكە سالا كەتەيىك، باياناۋىلدا ءبىر دەمدە 5 مىڭ ادام دەمالا الاتىن 50 دەن اسا تۋريستىك نىسان بار.