باياناۋىل كولدەرىن بالدىردان تازارتۋ ءۇشىن 50 مىڭعا جۋىق اق امۋر جىبەرىلەدى

پاۆلودار. KAZINFORM - پاۆلودار وبلىسىنداعى ەرتىس وزەنى مەن باياناۋىلداعى كولدەردى بالىقتاندىرۋ ءۇشىن بيىل 100 ميلليون تەڭگە قاراستىرىلىپ وتىر. ونىڭ اياسىندا سابىندىكول مەن تورايعىر كولدەرىنە 48,6 مىڭ اق امۋر بالىعى جىبەرىلەدى دەپ جوسپارلانعان.

پاۆلودار وبلىسىندا مەملەكەت باسشىسى قاسىم-جومارت توقايەۆتىڭ بيوارتۇرلىلىك پەن بالىق رەسۋرستارىن قورعاۋ جونىندەگى شارالاردى كۇشەيتۋ قاجەتتىگىنە قاتىستى ايتىلعان تاپسىرماسىن ورىنداۋ ماقساتىندا كەشەندى باعدارلاما بەلسەندى تۇردە ىسكە اسىرىلىپ جاتىر. سوڭعى جىلدارى بالىق اۋلاۋ كولەمى ەداۋىر وسكەن.

- 2021 -جىلدان باستاپ ءوڭىردىڭ سۋ ايدىندارىنا 22,6 مىڭ بالىق وتىرعىزۋ ماتەريالدارى شىعارىلدى. 2024 -جىلعا ارنالعان جوسپارلار باعدارلامانىڭ ايتارلىقتاي كەڭەيۋىنە اسەر ەتپەكشى. سونىڭ ىشىندە باياناۋىل اۋدانىنداعى كولدەر مەن ەرتىس وزەنىنە قۇياتىن وزەندەردى 100 ميلليون تەڭگەگە بالىقتاندىرۋ جوسپارلانعان. بۇل ءىس-شارالار اياسىندا تۇقى تۇقىمداسىنىڭ 85 مىڭنان استام بالىعى شىعارىلادى. ماسەلەن تورايعىر كولىنە 10 مىڭ اق امۋر، سابىندىكولگە 38,6 مىڭ اق امۋر، سونداي-اق تالينكا سۋ قويماسىنا 2,3 مىڭ تۇقى جىبەرىلەدى، - دەپ حابارلادى وڭىرلىك جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنان.

بۇل شارالار بالىق رەسۋرستارىن قالپىنا كەلتىرۋگە عانا ەمەس، سونىمەن قاتار سۋ نىساندارىنىڭ ەكولوگيالىق جاعدايىن جاقسارتۋعا باعىتتالعان. اق امۋر تابيعي مەليوراتور رەتىندە سۋ ايدىندارىنداعى بالدىر مەن قامىستى ازايتۋعا كومەكتەسەدى. ءارى سۋدىڭ ساپاسىن جاقسارتۋعا، جەرگىلىكتى ەكوجۇيەلەردى ساقتاۋعا سەپ بولادى.

ەسكە سالا كەتەيىك، پاۆلودار پوليتسەيلەرى زاڭسىز اۋلانعان 15 توننادان استام بالىقتى تاركىلەدى.

اۆتور

مۇرات اياعان