سيرەك كەزدەسەتىن جىرتقىش جانۋار فوتومونيتورينگ جۇرگىزۋ بارىسىندا فوتوتۇزاققا ءتۇسىپ قالعان. بۇل تۋرالى Qazaq Ormany الەۋمەتتىك جەلىدەگى پاراقشاسىندا حابارلادى، دەپ جازادى Kursiv.Media.
مامانداردىڭ مالىمەتىنشە، قۇنۋ (راسوماحا) - سۋسار تۇقىمداسىنا جاتاتىن سيرەك كەزدەسەتىن جىرتقىش. قازاقستاندا ونىڭ نەگىزگى تارالۋ ايماعى وڭتۇستىك التايدىڭ تاۋلى-تايگالى وڭىرلەرىن قامتيدى.
الايدا بۇل جانۋاردىڭ ءوزىنىڭ نەگىزگى مەكەنىنەن ەداۋىر الىس اۋماقتاردا كەزدەسكەنى تۋرالى تاريحي دەرەكتەر دە بار.
ماسەلەن، 1932-جىلى قۇنۋ قازىرگى اقمولا وبلىسىنداعى بۋراباي ورماندارىندا بايقالعان. ال 1948-1949-جىلدارى سولتۇستىك قازاقستان وبلىسىنداعى شاعالالى كولى ماڭىندا تىركەلگەن.
عالىمدار مۇنداي جاعدايلاردى جەكەلەگەن جانۋارلاردىڭ الىس قاشىقتىققا قونىس اۋدارۋىمەن بايلانىستىرادى.
باياناۋىلدا قۇنۋ العاش رەت تىركەلىپ وتىر. مامانداردىڭ پىكىرىنشە، سيرەك جىرتقىشتىڭ نەگىزگى تارالۋ ايماعىنان الىس جەردە انىقتالۋى ونىڭ قوزعالىسى مەن تارالۋ ەرەكشەلىكتەرىن زەرتتەۋگە جاڭا مۇمكىندىك بەرەدى.
بۇعان دەيىن، «التىن ەمەل» ۇلتتىق پاركىندە قار بارىسى فوتوتۇزاققا ءتۇسىپ قالعان ەدى.