باياناۋىل ورماندارىندا اياعىن ارەڭ باسىپ بارا جاتقان بۇلاننىڭ اتالىعى ۆيدەوعا ءتۇستى.
ۆيدەو اۆتورى ونى شاماسى شايقاستان جاراقات الىپ قالعان بولۋى مۇمكىن دەپ جازعان.
باياناۋىل ۇلتتىق پاركى ماماندارىنىڭ ايتۋىنشا، بۇلانداردىڭ اتالىقتارى كوبىنە اۋماق ءۇشىن تالاسادى. ولار جالعىز ءجۇرىپ، كۇيەك كەزىندە شاعىلىساتىن ۇرعاشى بۇلانداردى ىزدەيدى. سونداي ساتتە اتالىقتارى ءبىر-بىرىمەن كەزىگىپ قالسا، شايقاسقا شىعادى. وتكىر تۇياقتارىمەن، مۇيىزدەرىمەن ءبىرىن-ءبىرى جارالايدى.
- بۇلار ءۇيىر ۇستامايتىن، ەكى-ۇشەۋدەن جۇرەتىن جانۋارلار. شاعىلىسۋ مەزگىلىندە وزدەرىن وتە اگرەسسيۆتى تۇردە ۇستايدى. اتالىقتارى كوبىنە جالعىز جۇرەدى. ادامدار بۇل ۋاقىتتا جانۋارلارمەن بەت-بەت كەزدەسىپ قالۋدان ساق بولۋى كەرەك،-دەيدى اڭشىلىق تانۋشى بەكزات اكىمبەكوۆ.