باياناۋىل ۇلتتىق پاركىندە العاشقى قار جاۋدى

باياناۋىل ۇلتتىق پاركىنىڭ اۋماعىندا بيىلعى العاشقى قار ءتۇستى. ۇلپا قارعا كومىلگەن اسقار تاۋلار مەن قاراعاي ورماندارىنىڭ كورىنىسىنەن بولەك، كادردا سوڭعى ۋاقىتتا بۇل اۋماقتى تۇراقتى مەكەنىنە اينالدىرعان بۇلان دا بايقالىپ قالدى.
ۆيدەونى جەرگىلىكتى تابيعات جاناشىرى ەسەن جۇسىپبايەۆ تۇسىرگەن.
ايتىپ وتەلىك، ۇلتتىق پارك 1985 -جىلى 12-تامىزدا پاۆلودار وبلىسى باياناۋىل اۋدانىندا قۇرىلعان. بىرنەشە ورمانشىلىقتان تۇرادى. وزگە ەرەكشە قورعالاتىن تابيعي اۋماقتارعا قاراعاندا مۇندا تابيعي ەسكەرتكىشتەر ءجيى كەزدەسەدى. پارك اۋماعىندا 24 ارحەولوگيالىق تابيعي ەسكەرتكىش ورنالاسقان - كەمپىرتاس، قوڭىر اۋليە ۇڭگىرى، دراۆەرت ۇڭگىرى، تاستاعى كونە جازۋلار، سايمانتاس، كوگەرشىنتاس، اتباسى تاسى، نايزاتاس جارتاسى جانە ت. ب. بۇدان بولەك، تاريحي ورىندار دا مولىنان شوعىرلانعان.
اۋماقتا نەگىزىنەن ءتورت سۋ ايدىنى - تورايعىر، بىرجانكول، سابىندىكول جانە جاسىباي كولى ورنالاسقان. بۇل كولدەردىڭ بارلىعىنىڭ سۋى تۇشى. سونىڭ ىشىندە جاسىباي كولىنىڭ اينالاسى دەمالىس ايماعىنا اينالعان.
جاسىباي، سابىندىكول جانە تورايعىر دەمالىس ايماقتارىندا جەلتوقساننان باستاپ قىستى تۋريزم اشىلادى. مۇنداعى ەڭ تانىمال تۋريستىك باعىت - مىرزاشوقى تاۋ-شاڭعى كەشەنى. بۇل ۇزىندىعى 960 مەترلىك ارقان جولى بار دەمالىس نىسانى. اسىرەسە ەكسترەمالدى سپورت ءتۇرىن ۇناتاتىندار ءۇشىن قىزىقتى.