سارىكولدىڭ ارتقى توبەسىندە وتكەن بۇركىتشىلەر مەرەكەسىنە مىڭداعان ادام قاتىستى. ولاردىڭ قاتارىندا الەمنىڭ ءار ەلىنەن كەلگەن تۋريستەر دە بار. جالپى 27-رەت ءوتىپ جاتقان «بۇركىتشىلەر مەرەكەسىنە» ارنايى كەلىپ تاماشالايتىن شەتەلدىك تۋريستەر مەن مونعوليا ازاماتتارىنىڭ دا سانى جىل سايىن ارتا تۇسكەن.
«حالقىمىزدىڭ ساياتشىلىق ءداستۇرىن الەمگە تانىتۋ جولىندا وتە كوپ جۇمىستاردى ىستەپ جاتىرمىز. بۇركىت تۋرالى، رۋحاني قۇندىلىق جونىندە زەرتتەۋلەر دە جۇرگىزىپ كەلەمىز. ءۇش جىلدان بەرى ءبىز ولگەي قالاسى ورتالىعىندا بۇركىتشىلەر سارايىن سالىپ ىسكە قوسۋدى قولعا الىپ، ىسكە كىرىسكەن بولاتىنبىز. قازىرگى كۇنى «بۇركىتشىلەر سارايى» ىسكە قوسىلىپ، جۇمىسىن جاقسى جۇرگىزىپ وتىر. مادەني مۇرانى ساقتاپ، بۇگىنگى كۇنگە جەتكىزىپ وتىرعان بۇركىتشىلەرىمىزگە زور العىس- ريزاشىلىعىمدى بىلدىرگىم كەلەدى. الەمنىڭ ءار تۇكپىرىنەن كەلىپ تاماشالاپ جاتىر. وتكەن جىلى 600 گە جۋىق تۋريست كەلسە، بيىلعى جىلى دا 600-700 شەتەلدىك تۋريست كەلگەن دەگەن اقپارات كەلىپ جاتىر. بيىل وسى مەرەكەگە قاتىسۋ ءۇشىن سەكسەنگە جۋىق بۇركىتشى تىركەلگەن. جولدا كەلە جاتقان، ەندى تىركەلەتىن ساياتشىلار ءالى دە بار. وسىعان قاراعاندا بۇگىنگى مەرەكەگە 90 عا جۋىق بۇركىتشى قاتىسىپ، سايىساتىن بولادى دەپ وتىرمىز»، - دەپ اتاپ كورسەتتى، وسى سايىستى ۇيىمداستىرۋشىلاردىڭ ءبىرى بەكبولات بۇعىباي ۇلى.
مۇندا بۇركىت پەن بۇركىتشىنىڭ شەبەرلىگىن سىنايتىن ءتۇرلى جارىستارىنان وزگە قازاقتىڭ ءداستۇرلى «قىزقۋار»، كوكپار» سايىسى وتكىزىلىپ، قولونەرشىلەر كورمەسى كەلۋشىلەردىڭ نازارىنا ۇسىنىلادى. ايتا كەتەر بولساق، «بۇركىت تويى» - موڭعولياداعى قازاقتاردىڭ اتادان بالاعا مۇرا بولىپ كەلە جاتقان اڭشىلىق ونەرىن، ۇلتتىق ويىندارى مەن تۇرمىس-سالت ءداستۇرىن دارىپتەۋدى كوزدەيتىن اۋقىمدى ءىس- شارا.
بۇركىتپەن اڭ اۋلاۋ ءداستۇرى ورتالىق ازيانىڭ كوشپەندىلەر اراسىندا 6000 جىلدان بەرى تامىرى ۇزىلمەي كەلە جاتقان بەكزات ونەر. ونى ەڭ جاقسى ساقتاعان حالىق - موڭعوليا قازاقتارى. وسىنى ەسكەرە وتىرىپ، تاريحى تەرەڭگە جايىلعان ءداستۇردى ناسيحاتتاپ، شەتەلدىك تۋريستەرگە كورسەتىپ جانە سول تۋريستەردىڭ سۇراۋى بويىنشا موڭعوليادا «بۇركىت تويى» جىلىنا ەكى رەت وتەتىن دەڭگەيگە جەتتى. بۇعان دەيىن موڭعوليا استاناسى ۇلان-باتىر قالاسىندا «بۇركىت تويى - 2025» («بۇرگەدين بايار») حالىقارالىق فەستيۆالى وتكەنىن حابارلعانبىز. ەل استاناسىنا جاقىن ورنالاسقان «شىڭعىس حان ورداسى» تۋريستىك كەشەنىندە وتكەن شاراعا 22 بۇركىتشى قاتىستى. حالىقارالىق فەستيۆالگە موڭعوليانىڭ بايان-ولگي، ءتوۆ، سەلەنگە، ارحانگاي ايماقتارىنان جانە قازاقستان مەن قىرعىزستاننان بۇركىتشىلەر قاتىستى.
e-history.kz