باپي جۋرناليست ايدوس سادىقوۆقا جاسالعان قاستاندىق جايلى: مۇنىڭ ارتىندا ەسكى قازاقستان تۇرۋى مۇمكىن

استانا. KAZINFORM - ءماجىلىس دەپۋتاتى ەرمۇرات باپي كيەۆتە قازاقستاندىق جۋرناليست ايدوس سادىقوۆقا قاستاندىق جاسالۋىنا وراي پىكىر ءبىلدىردى.

«ايدوس پەن ناتاليا سادىقوۆتارمەن تانىسپىن، تىعىز بايلانىستا بولدىق. ولار - كاسىبي جۋرناليستەر. قاستاندىققا قاتىستى نۇسقاعا وراي ايتار بولسام، بۇل - بارىپ تۇرعان ارانداتۋشىلىق. ءبىزدىڭ كەيبىر ينتەرنەت رەسۋرستار بۇل وقيعانىڭ تاساسىندا قازاقستان بيلىگى تۇر دەگەن دولبار جاسايدى. قازاقستان بيلىگىنە مۇنداي توپاستىقتى ۇيىمداستىرۋدىڭ قاجەتى قانشا؟ بۇل قاي جاعىنان الىپ قاراساق تا ءتيىمسىز، لوگيكاعا سىيمايدى. مۇنىڭ تاساسىندا ەسكى قازاقستاننىڭ وكىلدەرى نەمەسە قازاقستاندى ماسەلەن رەسەيمەن، وزگە مەملەكەتپەن، مۇمكىن ۋكراينامەن قاقتىعىستىرعىسى كەلەتىن ءۇشىنشى كۇشتەر تۇرۋى مۇمكىن. ياعني، ءتۇرلى نۇسقا بار»، - دەدى ول پارلامەنت پالاتالارىنىڭ بىرلەسكەن وتىرىسىنان كەيىن.

سونىمەن قاتار دەپۋتات بۇل ءىستى مەملەكەت باسشىسى باقىلاۋىنا العانىن اتاپ ءوتتى.

«تەرگەۋ ءجۇرىپ جاتىر. قازىر قانداي دا ءبىر جورامال جاساماي تۇرا تۇرايىق. مەنىڭشە، ءبىر-ەكى كۇننىڭ ىشىندە باس پروكۋراتۋرا ناقتى ءمان- جايدى انىقتاپ، جاريا ەتەر»، - دەدى ەرمۇرات باپي.

اۆتور

مارلان جيەمباي