باتىس قازاقستاندا رەسەيلىك اسكەري تەحنيكا اۋىل ىشىمەن جۇرگەن

ورال. KAZINFORM - باتىس قازاقستان وبلىسى بوكەي ورداسى اۋدانى سايقىن اۋىلىندا رەسەيلىك اسكەري تەحنيكانىڭ جۇرگەنى تۋرالى الەۋمەتتىك جەلىدە بەينەجازبا تارالدى.

بوكەي ورداسى اۋدانى اكىمدىگىنەن ءمالىم ەتكەنىندەي، اتالمىش اۋدان اۋماعىندا حالىقارالىق كەلىسىمشارتقا سايكەس رەسەي فەدەراتسياسى قازاقستاننان جالعا العان پوليگون جەرى بار.

«رەسەيلىك تەحنيكا كەلىسىمگە سايكەس پوليگونعا ەلدى مەكەندەردەن تىس جەرلەرمەن قاتىنايدى. الايدا بىرنەشە كۇن بويى جاۋعان جاڭبىردىڭ سالدارىنان جولدىڭ بۇزىلىپ كەتۋىنە بايلانىستى 20-قازان كۇنى 5 اۆتوكولىك سايقىن اۋىلى ىشىندەگى قاتقىل تاباندى جولمەن جۇرگەن. اۆتوكولىكتەردىڭ ءبىرى گاز قۇبىرىن قاعىپ كەتكەن. دەگەنمەن بۇدان ەلەۋلى بۇزۋشىلىق بولماعان، گاز شىققان جوق. قازىرگى كەزدە جەرگىلىكتى اتقارۋشى ورگاندار مەن بوكەي ورداسى اۋدانى پوليتسيا ءبولىمى وقيعانىڭ ءمان-جايىن انىقتاپ، كىنالى ادامداردى جاۋاپكەرشىلىككە تارتۋ ماسەلەسى قاراستىرىلۋدا. كەلىسىمگە سايكەس اتالعان اسكەري تەحنيكامەن ارنايى پوليتسيا كولىگىنىڭ بىرگە ءجۇرۋى قاراستىرىلماعان»، - دەپ حابارلادى ۆەدومستۆودان.

 

اۆتور
عايساعالي سەيتاق