باتىس قازاقستاندا قاپتاعان كيىك ەگىستىك القاپتارىن بۇلدىرۋدە

ورال. KAZINFORM - باتىس قازاقستان وبلىسىندا كيىكتەر ەگىستىك القاپتارىنا دا كىرىپ كەتىپ جاتىر. تاسقالا اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى ساميعوللا شۇكىروۆتىڭ ءمالىم ەتكەنىندەي، مەرەي اۋىلدىق وكرۋگىندە «بىرلىك+» شارۋا قوجالىعىنىڭ 460 گەكتار ەگىس القابىنا كۇنىنە 30-50 باس كيىك كەلەدى.

ونىڭ سوزىنە قاراعاندا، دوستىق اۋىلدىق وكرۋگىندە «كارەن» شارۋا قوجالىعىنىڭ 330 گەكتار بيداي القابىنا دا كيىك ءتۇسىپ جاتىر.

«اۋدان بويىنشا بەس اۋىلدىق وكرۋگ ەگىن ەگەدى. كيىكتەر ەگىنگە وتكەن جىلى ءتۇسىپ، تاپاعان ەدى. بيىل دا سولاي. سونىمەن قاتار قازاقستان، شەجىن، مەرەكە اۋىلدىق وكرۋگتەرىنىڭ شابىندىق- جايىلىمدارىندا، جايىقباي كانالى بويىندا 300-500 دەي كيىك ءجۇر. بيىل ءشوپ قويۋ بولعانىمەن، الاسا. ونى دا كيىك جەپ جاتىر»، دەدى س. شۇكىروۆ.

كيىك نەگىزىنەن ب ق و-نىڭ جانىبەك، كازتالوۆ، بوكەي ورداسى، جاڭاقالا اۋداندارىن كوبىرەك مەكەندەيدى. بوكەي ورداسى اۋدانىنىڭ اكىمى نۇرلىبەك داۋموۆتىڭ ايتۋىنشا، جاعداي بيىل كۇردەلى.

«قىستان مال ارىق شىقتى. شىعىن دا بارشىلىق. شارۋا قوجالىقتارى وتكەن جىلداردان قالعان مال ازىعى قورىن تاۋىستى. بيىل ەكى ايدان بەرى جاڭبىر جاۋعان جوق، ءشوپتىڭ شىعىمى ناشار. ونىڭ ۇستىنە كيىك كوبەيىپ، مالمەن بىرگە جايىلىپ ءجۇر. قازىرگى كەزدە اۋداننان تىسقارى جەرلەردەن مال ازىعىن جيناۋ ماسەلەسى قاراستىرىلىپ جاتىر. وعان قوسا وسىعان بايلانىستى اۋداندا توتەنشە جاعداي جاريالاۋ كەرەكتىگى تۋرالى ۇسىنىس ءتۇسىپ جاتىر»، - دەدى ن. داۋموۆ.

ب ق و ورمان شارۋاشىلىعى جانە جانۋارلار دۇنيەسىن قورعاۋ جونىندەگى اۋماقتىق ينسپەكتسياسىنىڭ باسشىسى نۇرلان راحىمجانوۆ كوكتەمگى اۋە ساناعىنىڭ قورىتىندىسى بويىنشا ورال پوپۋلياتسياسىنداعى كيىكتەردىڭ سانى 1 ميلليون 620 مىڭ باسقا جەتكەنىن مالىمدەدى.

ايتسە دە، بۇل ەسەپكە كيىكتىڭ بيىلعى تولدەرى كىرمەگەن. اتالعان اۋداندار تۇرعىندارى مەن شارۋا قوجالىقتارىنىڭ وكىلدەرى كيىك سانى بۇدان دا كوپ ەكەنىن ايتادى.

ەسكە سالا كەتەيىك، بۇدان بۇرىن باتىس قازاقستاندا كيىكتەردىڭ كوبەيۋى شارۋا قوجالىقتارىن الاڭداتىپ وتىرعانىن جازعان بولاتىنبىز.

اۆتور
عايساعالي سەيتاق