باتىس قازاقستاندا ۇشقىشسىز ۇشاتىن اپپاراتتىڭ بولشەكتەرى تابىلدى

ورال. KAZINFORM - باتىس قازاقستان وبلىسىندا رەسەيمەن شەكتەسەتىن جانىبەك اۋدانىندا ۇشقىشسىز ۇشاتىن قۇرىلعىنىڭ سىنىقتارى تابىلعانى جونىندە دەرەك تىركەلدى.

جانىبەك اۋدانى اكىمدىگىنەن ءمالىم ەتكەنىندەي، وقيعا 24-ناۋرىز كۇنى ۇزىنكول اۋىلدىق وكرۋگى اۋماعىندا بولدى.

اۋىل تۇرعىنى ەلدى مەكەننەن شامامەن 8 شاقىرىم قاشىقتىقتا بەلگىسىز ۇشقىشسىز ۇشاتىن قۇرىلعى بولشەكتەرىنىڭ تابىلعانى جونىندە حابارلاعان.

- اتالعان وقيعا بويىنشا تەرگەۋ توبى بارىپ، قاراۋ كەزىندە ۇشقىشسىز ۇشاتىن قۇرىلعىنىڭ بولشەكتەرى تابىلدى. قازىرگى ۋاقىتتا وقيعا ورنى قورشاۋعا الىنىپ، تەرگەۋ امالدارى جۇرگىزىلۋدە، - دەپ حابارلادى ۆەدومستۆودان.

ب ق و پوليتسيا دەپارتامەنتىنىڭ باسپا ءسوز قىزمەتى ۋاكىلەتتى قىزمەتتەرمەن بىرلەسىپ، تەكسەرۋ جۇمىستارىنىڭ جۇرگىزىلىپ جاتقانىن جەتكىزدى. نىسان ەلدى مەكەننەن الىس جەردەن تابىلعان.

وقيعانىڭ بارلىق ءمان-جايى انىقتالۋ ۇستىندە.

بۇل - باتىس قازاقستان وبلىسىندا بولعان ءۇشىنشى وقيعا. بۇدان بۇرىن 18-اقپاندا بوكەي ورداسى اۋدانى ۇيالى اۋىلى ماڭىندا ۇشقىشسىز ۇشاتىن اپپاراتقا ۇقساس قۇرىلعى قۇلاعان ەدى. وسىنداي جاعداي 18- ناۋرىزدا تاسقالا اۋدانىندا قايتالاندى.

ەسكە سالا كەتەيىك، بۇدان بۇرىن باتىس قازاقستانعا ۇشقىشسىز ۇشاتىن اپپارات قۇلاعانىن جازعان بولاتىنبىز.