كيىك ەتىن قابىلدايتىن 15 كاسىپورىن بار. ءار اۋلانعان كيىك ءۇشىن اڭشىلارعا 5 مىڭ تەڭگەگە دەيىن تولەنسە، ىشەك-قارنى الىنعان كيىك توشكەسىنىڭ كەلىسى مال سويۋ ورىندارىنا 500 تەڭگەدەن تاپسىرىلعان. ولار ءوز كەزەگىندە ەتتى حالىققا 1600 تەڭگەدەن ساتقان. «وحوتزووپروم» مەكەمەسى 91 مىڭ 800 دانا كيىك ءمۇيىزىن تاڭبالاپ-قۇجاتتاپ، الماتىعا ارنايى قويماعا جىبەرگەن.
«بيىل جينالعان ءمۇيىز ەكسپورتقا شىعارىلۋى مۇمكىن»، - دەيدى ماماندار. دەگەنمەن دالا جانۋارىنىڭ سانىن ازايتۋ ماسەلەسى تۇرعىنداردىڭ كوڭىلىنەن شىقپاي تۇر. عالىمدار وتكەن جىلى وڭىردە 460 مىڭ باس كيىك اۋلاۋعا ليميت بەرسە، سونىڭ تەك شيرەگى عانا ورىندالعان.
قايرات قادەشيەۆ، ب ق و ورمان شارۋاشىلىعى جانە جانۋارلار دۇنيەسى ينسپەكسياسى باسشىسىنىڭ ورىنباسارى:
- بىلتىرعى ساناق ناتيجەسى بويىنشا وڭىردە 2 ميلليون 300 مىڭ بوكەن ەسەپتەلدى. بيىلعى كوكتەمگى ساناق جوسپار بويىنشا كەلەسى اپتادا، ياعني 12- ساۋىردە باستالادى. وتكەن جىلى كيىك سانىن رەتتەۋ جۇمىستارى ۇكىمەت قاۋلىسىنا سايكەس شىلدەدە باستالدى. ال بيىل قاۋلى ازىرگە شىقپادى. قازىر دايىندىق ءجۇرىپ جاتىر. بىلتىرعى اڭشىلار بريگادالارىمەن بيىل دا كەلىسىمگە وتىرامىز.
24.kz