باتىس قازاقستانعا تاعى ءبىر ۇشقىشسىز ۇشاتىن اپپاراتتىڭ بولشەكتەرى تابىلدى
ورال. KAZINFORM - باتىس قازاقستان وبلىسى كازتالوۆ اۋدانى اۋماعىنا ۇشقىشسىز ۇشاتىن اپپارات قۇلاعانى تۋرالى اقپارات تارادى.
ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، ۇشقىشسىز ۇشاتىن اپپاراتتىڭ بولشەكتەرىنە ۇقساس زاتتىڭ تابىلۋىنا بايلانىستى ۋاكىلەتتى قىزمەتتەرمەن بىرلەسىپ تەكسەرۋ ءىس-شارالارى جۇرگىزىلىپ جاتىر.
- نىسان ەلدى مەكەننەن الىس اۋماقتان تابىلعان. قازىرگى كەزدە وقيعانىڭ بارلىق ءمان-جايى انىقتالۋ ۇستىندە، - دەپ حابارلادى ۆەدومستۆودان.
تۇرعىنداردىڭ سوزىنە قاراعاندا، وقيعا 27-ناۋرىز كۇنى كەشكىسىن كوكتەرەك اۋىلدىق وكرۋگى اۋماعىندا بولدى. ۇشقىشسىز ۇشاتىن اپپارات بولشەكتەرى سارالجىن (كيروۆ) ەلدى مەكەنىنەن 10 شاقىرىمداي قاشىقتىقتا تۇسكەن.
بۇدان بۇرىن وسىنداي وقيعالار بوكەي ورداسى اۋدانى ۇيالى، تاسقالا اۋدانى اتامەكەن جانە جانىبەك اۋدانى ۇزىنكول، قامىستى اۋىلدارى ماڭىندا بولعان ەدى.
ەسكە سالا كەتەيىك، بۇدان بۇرىن اتالعان وڭىرگە ءۇش رەت ۇشقىشسىز ۇشاتىن اپپاراتتىڭ بولشەكتەرى تابىلعان بولاتىن.
اۆتور
عايساعالي سەيتاق