باتىس قازاقستان وبلىسىندا ءىرى ينتەرنەت-الاياقتىق اشكەرەلەندى

استانا. KAZINFORM - پوليتسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسىنىڭ قىزمەتكەرلەرى جەدەل-ىزدەستىرۋ ءىس- شارالارى بارىسىندا كريپتوۆاليۋتاعا ينۆەستيتسيا جاساۋ ارقىلى ينتەرنەت-الاياقتىقتىڭ اۋقىمدى سىزباسىن ۇيىمداستىردى دەگەن كۇدىكتىنى ۇستادى، دەپ حابارلايدى Polisia.kz.

ءىرى الاياقتىق بويىنشا قولعا تۇسكەن كۇدىكتى باتىس قازاقستان وبلىسىنىڭ 27 جاستاعى تۇرعىنى ەكەنى انىقتالدى.

تەرگەۋ بارىسىندا كۇدىكتىنىڭ كريپتوۆاليۋتا ساتىپ الۋ-ساتۋ سىلتاۋىمەن وبلىستىڭ 20 دان استام تۇرعىنىن الاياقتىققا «دروپپەر» رەتىندە تارتقانى بەلگىلى بولدى. ۇرلانعان اقشا دروپپەرلەردىڭ بانك شوتتارى ارقىلى اۋدارىلعان.

كۇدىكتى تۇسكەن قاراجاتتى Bybit جانە Binance ونلاين- پلاتفورمالارى ارقىلى كريپتوۆاليۋتاعا اينالدىرىپ، الاياقتارعا جىبەرىپ، وسى قىزمەتى ءۇشىن سىياقى الىپ وتىرعان. ول استانا قالاسىندا قولعا ءتۇستى. قازىرگى ۋاقىتتا ول ورالدا قاماۋدا وتىر. قىلمىستىق ءىس بويىنشا تەرگەۋ اياقتالۋعا جاقىن.

- وسى رەتتە پوليسيا قىزمەتكەرلەرى حالىقتى بارىنشا مۇقيات بولۋعا شاقىرادى. جەكە دەرەكتەرىڭىزدى جانە بانك رەكۆيزيتتەرىڭىزدى بوگدە ادامدارعا بەرمەۋدى سۇرايدى. سەبەبى ءسىز قىلمىستىق ءىس-ارەكەتكە قاتىستى ادامعا اينالۋىڭىز مۇمكىن، - دەلىنگەن اقپاراتتا.

بانك شوتىنا، تولەم نەمەسە سايكەستەندىرۋ قۇرالدارىنا زاڭسىز قول جەتكىزۋ، ونى بەرۋ نەمەسە الۋ، سونداي-اق زاڭسىز تولەمدەر مەن اقشا اۋدارىمدارىن جۇزەگە اسىرۋ، ونىڭ ىشىندە ماتەريالدىق سىياقى ءۇشىن ءۇشىنشى تۇلعالارعا بانك كارتاسىن بەرۋ ارەكەتتەرى دروپپەرلىك بولىپ سانالادى.

بۇل ارەكەت ينتەرنەت-الاياقتىقتىڭ نەگىزگى ادىستەرىنىڭ ءبىرى. ۇرلانعان قاراجاتتى قولما-قول اقشاعا اينالدىرۋ مەن شىعارۋ ءۇشىن قولدانىلادى. اتالعان نورما كيبەرالاياقتىققا قارسى جۇيەلى كۇرەستى، ازاماتتاردىڭ قارجىلىق قاۋىپسىزدىگىن نىعايتۋدى جانە سيفرلىق ورتادا ارەكەت ەتەتىن قىلمىستىق توپتاردىڭ قىزمەتىن توقتاتۋدى كوزدەيدى.