باتىس قازاقستان وبلىسىندا العاشقى قار جول قاتىناسىن قيىنداتتى

 باتىس قازاقستان وبلىسىندا العاشقى قار جاۋىپ، كولىك قاتىناسى قيىندادى، دەپ حابارلايدى Kazinform. 

تۇرعىندار 26-قازان كۇنى جاڭاقالا، جانىبەك، كازتالوۆ اۋداندارىنا جاۋعان قاردىڭ فوتو، ۆيدەولارىن الەۋمەتتىك جەلىگە جۇكتەپ جاتىر. ولارعا سۇيەنسەك، جانىبەك اۋدانى جاقسىباي اۋىلىندا ءتىپتى، بوران سوققان.

سول سەكىلدى جاڭاقالا اۋدانىندا قار ارالاس جاڭبىر جاۋىپ، ارتى كوكتايعاققا اينالعان. پوليتسەيلەر الىس جولعا شىقپاۋعا كەڭەس بەرىپ، ۆيدەو جاريالادى.

ب ق و پوليتسيا دەپارتامەنتىنىڭ باسپا ءسوز قىزمەتى اقجايىق اۋدانىندا دا قار جاۋىپ تۇرعانىن ءمالىم ەتتى. دەگەنمەن، بارلىق جول اشىق، جول- كولىك وقيعالارى تىركەلمەگەن.

وبلىستىق توتەنشە جاعدايلار دەپارتامەنتىنىڭ حابارلاۋىنشا، 27-قازاندا ءوڭىردىڭ باتىسى مەن وڭتۇستىگىندە قاتتى جاۋىن-شاشىن (جاڭبىر، قار) كۇتىلەدى. جەلدىڭ ەكپىنى كەي جەرلەردە سەكۋندىنا 15-20 مەترگە جەتەدى. ورال قالاسىندا تۇمان، كوكتايعاق بولۋى ىقتيمال.

تۇرعىندار اراسىندا توتەنشە جاعدايلارعا جول بەرمەۋ، ومىرلىك ماڭىزى بار نىساندار مەن ەلەكتر جانە بايلانىس جۇيەلەرىنىڭ ۇزدىكسىز جۇمىسىن قامتاماسىز ەتۋ باعىتىندا ءتيىستى شارالار قولعا الىنىپ جاتىر.