باتىس قازاقستان وبلىسىنا باستى قاۋىپ - جايىق وزەنى سۋىنىڭ كوتەرىلۋى

استانا. KAZINFORM - باتىس قازاقستان وبلىسىنا باستى قاۋىپ جايىق وزەنى سۋىنىڭ كوتەرىلۋى بولىپ تۇر. بۇل تۋرالى ب ق و ت ج د رەسمي وكىلى نۇرجان تولەۋىش ايتتى.

«وبلىس بويىنشا سۋ تاسقىنىنىڭ الدىن الۋ اپاتتىق قۇتقارۋ جۇمىستارى قارقىندى جالعاسىپ جاتىر. وبلىسىمىزعا سۋ كەلۋىنە بايلانىستى جەرگىلىكتى اۋقىمداعى 6 توتەنشە جاعداي جاريالانعان. سوڭعى مالىمەتتەر بويىنشا 13732 ادام، ونىڭ ىشىندە 5703 بالا ەۆاكۋاتسيالاندى. كوپشىلىگى تۋعان- تۋىستارىنىڭ ۇيىنە ورنالاستى. وبلىس بويىنشا 13 ەۆاكۋاتسيالىپ پۋنكتتە 2300 ادام ورنالاسقان. قازىرگى ۋاقىتتا وبلىسىمىزعا ەرىگەن قار سۋىنان كەلەتىن قاۋىپ جوق. باستى قاۋىپ - جايىق وزەنىنىڭ سۋ دەڭگەيىنىڭ كوتەرىلۋى. سول سەبەپتى بارلىق كۇش- قۇرال جايىق وزەنى بويىندا ورنالاسقان ەلدى مەكەندەردى سۋدان الىپ قالۋ ءۇشىن جۇمىس ىستەپ جاتىر»، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، جايىق وزەنىنىڭ جاعاسىن بيىكتەتۋ، نىعايتۋ جۇمىستارى جۇرگىزىلىپ جاتىر.

«جايىق وزەنىنىڭ بويىنشا 84 ەلدى مەكەن ورنالاسقان. سول ەلدى مەكەندەردىڭ تۇرعىندارىن الدىن الا ەۆاكۋاتسيالاۋ، قۇلاقتاندىرۋ جانە ۇيلەردى ارالاۋ قارقىندى ءجۇرىپ جاتىر. قازىرگى ۋاقىتتا 9 ەلدى مەكەن جول قاتىناسىنسىز قالىپ وتىر»، - دەدى نۇرجان تولەۋىش.

رەسمي وكىلدىڭ دەرەگىنشە، ب ق و- عا رەسپۋبليكانىڭ 7 وڭىرىنەن قوسىمشا كۇش- قۇرالدار بولىنگەن. ولاردىڭ باسىم بولىگى وڭىرگە جەتتى. 6501 مامان، 683 تەحنيكا، 114 ءجۇزۋ قۇرالى جانە 3 اۋە كەمەسى سۋ تاسقىنىمەن كۇرەسكە جۇمىلدىرىلعان.

اۆتور

مارلان جيەمباي