باسقا ەلدەردەن كەلگەن ەتنيكالىق قازاقتارعا 55 «اتا جولى» كارتاسى بەرىلدى
استانا. KAZINFORM - بيزنەس- يمميگرانتتار جانە سۇرانىسقا يە ماماندار سانالاتىن باسقا ەلدىڭ ازاماتتارىنا - ەتنيكالىق قازاقتارعا قازاقستاندا 10 جىل ءومىر سۇرۋگە جانە جۇمىس ىستەۋگە قۇقىق بەرەتىن 55 «اتا جولى» كارتاسى تابىستالدى.
جەرگىلىكتى اتقارۋشى ورگاندارعا «اتا جولى» كارتاسىن الۋعا بارلىعى 75 ءوتىنىم ءتۇستى. 2023 -جىلى 44 كارتا: بيزنەس- يمميگرانتتارعا 20 كارتا جانە سۇرانىسقا يە ماماندارعا 24 كارتا بەرىلدى. بيىل 11 كارتا بەرىلدى: بيزنەسمەندەرگە 5 جانە سۇرانىسقا يە ماماندارعا 6 كارتا.
اتالعان كارتانى العانداردىڭ اراسىندا ينجەنەر- فيزيك، ينجەنەر- ماتەماتيك، حيميالىق تەحنولوگتار، جاق- بەت حيرۋرگياسى دارىگەرلەرى، پەدياترلار جانە ت. ب ماماندار بار. ولار 15 ەلدەن كەلدى: رەسەي، قىتاي، اۋعانستان، موڭعوليا، ا ق ش، اۋستريا، يزرايل، گەرمانيا، تۇركيا، وزبەكستان، قىرعىزستان، نيدەرلاند، فينليانديا، فرانسيا جانە تۇرىكمەنستان.
«اتا جولى» كارتاسىن ەنگىزۋدىڭ ماقساتى - تاريحي وتانمەن بايلانىستى نىعايتۋ، ۇلتتىق داستۇرلەردى ساقتاۋ، قازاقستاندا ولاردىڭ الەۋەتىن ىسكە اسىرۋ ءۇشىن ەلگە كاسىپقويلار مەن تابىستى بيزنەسمەندەردى تارتۋ. بۇل شەتەلدە تۇراتىن ەتنيكالىق قازاقتارعا ازاماتتىعىن ساقتاي وتىرىپ بەرىلەدى.
كارتا يەگەرلەرى ەلگە كىرگەن كەزدە 10 جىل مەرزىمگە تۇرۋعا رۇقسات الادى جانە ەڭبەك قىزمەتىن جۇزەگە اسىرۋ نەمەسە بيزنەس جۇرگىزۋ ءۇشىن قونىستانۋ ءوڭىرىن دەربەس تاڭدايدى.
«اتا جولى» كارتاسى بار ەتنيكالىق قازاق باسقا ەلدىڭ ازاماتى بولا وتىرىپ، قازاقستان ازاماتتارىمەن جانە قانداستارمەن تەڭ قۇقىقتارعا يە بولادى، بۇل ونىڭ قانداستان باستى ەرەكشەلەگى.
كارتا يەگەرلەرى (جانە ولاردىڭ وتباسى مۇشەلەرى) مىناداي قۇقىقتارعا يە:
- مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق مەكەمەلەردە الەۋمەتتىك تولەمدەر الۋ جانە قىزمەت كورسەتۋ؛
- ق ر ەڭبەك كودەكسىنە جانە «حالىقتىڭ كوشى- قونى تۋرالى» ق ر زاڭىنا سايكەس قازاقستان اۋماعىندا جۇمىسقا ورنالاسۋ؛
- ق ر كاسىپكەرلىك كودەكسىنە جانە وزگە دە قۇقىقتىق اكتىلەرىنە سايكەس قازاقستان اۋماعىندا كاسىپكەرلىك قىزمەتتى جۇزەگە اسىرۋ؛
- «ءبىلىم تۋرالى» ق ر زاڭىنا سايكەس مەملەكەتتىك ءبىلىم بەرۋ ۇيىمدارىندا تەگىن ورتا ءبىلىم الۋ، مەملەكەتتىك ورتا ارناۋلى جانە/نەمەسە جوعارى وقۋ ورىندارىندا كونكۋرستىق نەگىزدە تەگىن ورتا ارناۋلى جانە/نەمەسە جوعارى ءبىلىم الۋ، جەكە وقۋ ورىندارىندا اقىلى ءبىلىم الۋ؛
- «ادۆوكاتتىق قىزمەت جانە زاڭ كومەگى تۋرالى» ق ر زاڭىنا سايكەس مەملەكەت كەپىلدىك بەرگەن زاڭ كومەگىن الۋ؛
- ازاماتتىق سالاسىنداعى حالىقارالىق شارتتارعا جانە ق ر زاڭنامالىق قۇقىقتىق اكتىلەرىنە سايكەس جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋ.
«اتا جولى» كارتاسى بار ادامداردىڭ سايلاۋعا جانە ق ر پارلامەنتى مەن ءماسليحاتتارىنا سايلانۋعا، رەسپۋبليكالىق رەفەرەندۋمعا قاتىسۋعا قۇقىعى جوق جانە مەملەكەتتىك قىزمەتكە كىرە المايدى.
ەگەر «اتا جولى» كارتاسىنىڭ يەسى قازاقستان ازاماتتىعىن السا، كارتا جارامسىز دەپ تانىلادى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسى بويىنشا 2023 -جىلدىڭ شىلدەسىنەن باستاپ شەتەلدە تۇراتىن ەتنيكالىق قازاقتار ءۇشىن ەلگە جەڭىل كىرۋ/شىعۋ ماسەلەسى پىسىقتالعان «اتا جولى» كارتاسى ەنگىزىلدى.
اۆتور
ابىلايحان جۇماشيەۆ