باسەكەلەستىكتى قورعاۋ اگەنتتىگى تاكسي باعاسىن كوتەرگەن «ياندەكسكە» اۋديت جۇرگىزەدى

استانا. KAZINFORM - استانادا قاتتى جاۋىن-شاشىن سالدارىنان 2GIS شكالاسى بويىنشا 9 باللعا جەتكەن اۋقىمدى كەپتەلىس تۋىندادى. بۇل رەتتە باسەكەلەستىكتى قورعاۋ جانە دامىتۋ اگەنتتىگى «ياندەكس. تاكسي» قىزمەتىنىڭ قىمباتتاۋى جونىندە پىكىر ءبىلدىردى.

ۆەدومستۆونىڭ مالىمەتىنشە، مەرەكە الدىنداعى كۇندەرى، بۇقارالىق ءىس-شارالاردا نەمەسە قولايسىز اۋا رايى جاعدايلارى سياقتى جوعارى سۇرانىستا «قاۋىرت ساعات» الگوريتمى قولدانىلىپ، ساپاردىڭ ەڭ جوعارى قۇنى انىقتالادى. بۇل اۋا رايىنىڭ قولايسىزدىعى سەكىلدى تاكسيگە سۇرانىستىڭ ارتۋىمەن قاتار ساپار قۇنى دا وسەتىنىن بىلدىرەدى.

«قاۋىرت ساعات» الگوريتمىنە ىقپال ەتەتىن شارت - بوس جۇرگىزۋشىلەردىڭ ۇلەسى (اۋماقتاعى بوس كولىكتەردىڭ سانى جانە بەلگىلى ءبىر ۋاقىتتا تاپسىرىستاردان بوساتىلعان جۇرگىزۋشىلەردىڭ سانى). «قاۋىرت ساعات» مەرزىمى بوس جۇرگىزۋشىلەردىڭ قولجەتىمدىلىگى تۋرالى سەرۆيستىڭ تەحنيكالىق جانە ستاتيستيكالىق دەرەكتەرىنە سۇيەنە وتىرىپ، «ياندەكس. تاكسي» الگوريتمى ارقىلى اۆتوماتتى تۇردە ورنايدى. جوعارى سۇرانىس كەزىندە «قاۋىرت ساعاتتى» قولدانۋ ساپاردى كەيىنگە قالدىرا المايتىن جولاۋشىلارعا تاكسيدى پايدالانۋعا كومەكتەسەدى»، - دەپ ءتۇسىندىردى باسەكەلەستىكتى قورعاۋ اگەنتتىگى.

ودان بولەك، ياندەكس باعدارلامالىق جاساقتاماسىن، باعانى بەلگىلەۋگە اسەر ەتەتىن فاكتورلاردى (اۋا رايى، مەرەكە كۇندەرى، سۇرانىستىڭ ارتۋى، جۇرگىزۋشىلەردىڭ بولماۋى جانە ت. ب. ) ەگجەي-تەگجەيلى زەرتتەۋ ءۇشىن اگەنتتىك الگوريتمدىك باعا بەلگىلەۋ اۋديتىن جۇرگىزەدى.

«باسەكەلەستىكتى قورعاۋ سالاسىنداعى زاڭنامانى بۇزۋ بەلگىلەرى انىقتالسا، اگەنتتىك ءتيىستى دەن قويۋ شارالارىن قولداناتىن بولادى»، - دەپ تولىقتىردى ۆەدومستۆو.

ايتا كەتەيىك، كەشە استانادا قابانباي باتىر، سىعاناق، سارايشىق، ماڭگىلىك ەل كوشەلەرىندە جانە باسقا دا باعىتتاردا قوزعالىس قيىندادى. قاتتى جاڭبىر تاكسي باعاسىنىڭ ايتارلىقتاي وسۋىنە ىقپال ەتتى.

اۆتور
ايجان سەرىكجان قىزى