باسشىلىق باقىلاۋىندا: الماتى پوليتسياسى اقنار ولىمىنە بايلانىستى تەرگەۋ جۇرگىزىپ جاتىر

الماتى. KAZINFORM - الماتى پوليتسياسى بىلتىر قايتىس بولعان جاس قىزدىڭ ولىمىنە بايلانىستى قىلمىستىق ءىس قوزعادى.

2024-جىلدىڭ شىلدە ايىندا الماتىداعى كوپ قاباتتى ۇيلەردىڭ بىرىندە 7-قاباتتان قۇلاپ اقنار گۇلستان مەرت بولدى. مارقۇمنىڭ اناسى قىزىنىڭ بيىكتەن وزدىگىنەن سەكىرىپ كەتپەگەنىن، ول كىسى قولىنان قايتىس بولعانىن ايتىپ بىرنەشە رەت مالىمدەمە جاسادى. بۇل وقيعانى قازاقستاندىقتار بيىل الەۋمەتتىك جەلىدە قىزۋ تالقىلاي باستادى.

بۇگىن الماتى قالاسىنىڭ پوليتسيا دەپارتامەنتى جۇمباق جاعدايدا قايتىس بولعان قىزدىڭ ولىمىنە بايلانىستى جان-جاقتى تەرگەۋ ءجۇرىپ جاتقانىن حابارلادى.

- قالالىق پوليتسيا دەپارتامەنتىنىڭ تەرگەۋ باسقارماسى وتكەن جىلدىڭ شىلدە ايىندا الماتى تۇرعىنىنىڭ ءولىمى دەرەگى بويىنشا قىلمىستىق ءىس قوزعادى. قازىرگى ۋاقىتتا بولعان وقيعانىڭ تولىق كورىنىسىن انىقتاۋ ءۇشىن جان-جاقتى تەرگەۋ ءجۇرىپ جاتىر. تەرگەۋ شەڭبەرىندە ماتەريالدار جيناقتالىپ، تالدانۋدا، كۋالاردان جاۋاپ الىنۋدا، بەينەجازبالار زەردەلەنۋدە، زاڭدا كوزدەلگەن باسقا دا پروتسەسسۋالدىق ارەكەتتەر جۇزەگە اسىرىلىپ جاتىر، - دەپ مالىمدەدى دەپارتامەنتتەن.

سونىمەن قاتار پوليتسيا مالىمەتىنشە، تەرگەۋ بارىسى دەپارتامەنت باسشىلىعىنىڭ ەرەكشە باقىلاۋىندا.

- ءبىز مارقۇمنىڭ تۋىستارىنىڭ باستان كەشكەن قايعىسىنا شىن جۇرەكتەن ورتاقتاسامىز. سونىمەن قاتار سوڭعى پروتسەسسۋالدىق شەشىم بارلىق تاعايىندالعان ساراپتامالاردىڭ ناتيجەلەرىن العاننان كەيىن جانە قاجەتتى تەرگەۋ ارەكەتتەرىن جۇرگىزگەننەن كەيىن قابىلداناتىن بولادى، - دەلىنگەن پوليتسيا مالىمدەمەسىندە.

ەسكە سالايىق، بىلتىر 4-قازان كۇنى تالعار قالاسىنداعى توبەلەستەن 16 جاستاعى شەرزات پولات قايتىس بولدى.